Կարիերայի 400-րդ գոլային գործողությունը

Fri, 23 Oct 2026 21:23:27 +0400

Հայաստանի ազգային հավաքականի նախկին ավագ Հենրիխ Մխիթարյանը պրոֆեսիոնալ կարիերայում գրանցել է իր 400-րդ գոլային գործողությունը՝ գոլերի և գոլային փոխանցումների ընդհանուր հաշվարկով։

Հոբելյանական ցուցանիշին հայ կիսապաշտպանը հասել է հոկտեմբերի 21-ին կայացած Չեմպիոնների լիգայի «Ինտեր» – «Շախտյոր» հանդիպման ընթացքում։ Մխիթարյանը խաղադաշտ է դուրս եկել 75-րդ րոպեին, իսկ ընդամենը երկու րոպե անց գոլային փոխանցում կատարել Կառլոս Աուգուստոյին, որն էլ խփել է հանդիպման միակ գոլը՝ ապահովելով միլանյան թիմի հաղթանակը՝ 1։0։

Հատկանշական է, որ Մխիթարյանը գոլային փոխանցումը կատարել է իր նախկին թիմի դեմ խաղում։ Հայ ֆուտբոլիստը Դոնեցկի «Շախտյորի» կազմում հանդես է եկել 2010-2013 թվականներին։

Այսպիսով, հերթական արդյունավետ գործողությամբ Մխիթարյանը ոչ միայն նպաստել է «Ինտերի» հաղթանակին, այլև հասել կարիերայի նշանակալի անհատական ցուցանիշի։ 400 գոլային գործողության մասին տեղեկությունը հրապարակել է մարզական մեկնաբան Սուրեն Պողոսյանը։