Որտեղ «Ուժեղ Հայաստան»-ը կա, այնտեղ «Քաղաքացիական պայմանագրի» թևերը կտրվում են

Mon, 26 Oct 2026 15:00:31 +0400

ԱԺ «Ուժեղ Հայաստան» խմբակցության ղեկավար Նարեկ Կարապետյանի խոսքով՝ այն համայնքներում, որտեղ իրենք մասնակցել են ՏԻՄ ընտրություններին, իշխող «Քաղաքացիական պայմանագիր» կուսակցությունը գրանցել է ցածր արդյունքներ։

Լրագրողների հետ զրույցում Կարապետյանն անդրադարձել է Ստեփանավանում ընտրությունների արդյունքներին, որտեղ առաջատարը «Գործարար» կուսակցությունն է։ Երկրորդ տեղում ՔՊ-ն է, իսկ երրորդ հորիզոնականը զբաղեցրել է «Ուժեղ Հայաստանը»։

Ընդդիմադիր պատգամավորի խոսքով՝ ընտրությունների արդյունքներից հետո իշխող կուսակցությունը ստիպված է բանակցություններ սկսել հաղթող քաղաքական ուժի հետ՝ փոխքաղաքապետի պաշտոնը ստանալու նպատակով։

Կարապետյանը պնդել է, որ «Ուժեղ Հայաստանի» մասնակցությունն ընտրություններին սահմանափակում է ՔՊ-ի հնարավորությունները, մինչդեռ այն համայնքներում, որտեղ իրենք չեն մասնակցում, իշխանությունը, նրա գնահատմամբ, ճնշումների միջոցով կարողանում է գերակշռող դիրք ապահովել։

«Սա ցույց է տալիս, որտեղ «Ուժեղ Հայաստան»-ը կա, այնտեղ «Քաղաքացիական պայմանագրի» թևերը կտրվում են։ Որտեղ չկա «Ուժեղ Հայաստան»-ը, այնտեղ «Քաղաքացիական պայմանագիրը» կարողանում է լիարժեք դոմինացիա ստանալ՝ ճնշումների արդյունքում»,- ասել է նա։

Կարապետյանը նաև հայտարարել է, որ իր գնահատմամբ՝ քաղաքական դաշտում արդյունավետ պայքար կազմակերպելու կարողություն պահպանած ուժը «Ուժեղ Հայաստանն» է։