Երեկ ուշ երեկոյան Արցախի պետնախարար Նժդեհ Իսկանդարյանը հայտարարություն տարածեց, որ Արցախի Հանրապետության իշխանությունները ողջունում են Հայաստանի քաղաքական ուժերի՝ համազգային միավորման ձևավորման նախաձեռնությունը և այն արձանագրումը, որ առկա տարաձայնություններից վեր պետք է դասվեն ազգային ու պետական նշանակության առաջնահերթությունները։

Տեղեկացանք, որ այս հայտարարությանը նախորդել էր Արցախի իշխանությունների ժողովը։ Ժողովի ներկաների մեջ մեծ թիվ են կազմել Արցախի ԱԺ պատգամավորները։ Թեեւ մասնակիցների մեջ նեղվածություն եղել է, թե ինչու հենց նախաձեռնության հեղինակները արցախցիներին չեն հրավիրել ընդդիմադիրներին միանալու, սակայն պայմանավորվել են դրա վրա չֆիքսվել, քանի որ ազգային խնդիրները վեր են անձնական վիրավորվածությունից։ Արցախցիներին մտահոգել է հատկապես այն, որ օրակարգում հատուկ շեշտադրում չկա Արցախի ժողովրդի իրավունքների հարցին։
Հանդիպման ընթացքում անդրադարձ է կատարվել նաեւ Երևանի Նաիրի Զարյան 17/2 հասցեում գտնվող Արցախի Հանրապետության մշտական ներկայացուցչության շենքի շուրջ տիրող իրավիճակին։ ՀՀ վարչական դատարանը 2026թ-ի մայիսին բավարարել է ՀՀ դատախազության հայցը և անվավեր ճանաչել Արցախի կառավարության սեփականության իրավունքի պետական գրանցումը շենքի նկատմամբ, ինչպես նաև հողամասի օգտագործման իրավունքը։ Այժմ գործը վերաքննիչ դատարանում է, իսկ որոշումը հրապարակվելու է նոյեմբերի 26-ին։
Օրակարգում է եղել նաեւ Արցախի Աժ նախագահ ընտրելու հարցի շուրջ քննարկումները։ Մեր աղբյուրի փոխանցմամբ այս հարցը շարունակում է օդից առկախված մնալ, եւ դեռեւս ուղիներ չեն կարողանում գտնել։