«Պատմական» հանդիպում է լինելու
Sat, 14 Nov 2026 11:00:33 +0400
ԱՄՆ նախագահ Դոնալդ Թրամփը «պատմական հանդիպում» կանցկացնի Չինաստանի նախագահ Սի Ծինփինի և Ռուսաստանի նախագահ Վլադիմիր Պուտինի հետ Ասիա-խաղաղօվկիանոսյան տնտեսական համագործակցության (APEC) գագաթնաժողովի շրջանակներում, հաղորդում է New York Post-ը՝ հղում անելով Սպիտակ տանը։
Սա կլինի երեք երկրների առաջնորդների միջև առաջին հանդիպումը։ Հանդիպման ընթացքում կքննարկվի միջուկային զենքի վերահսկողության վերաբերյալ համապարփակ համաձայնագրի մշակումը։ Սպիտակ տունը թերթին հայտնել է, որ կողմերը կարող են նաև քննարկել Իրանի հակամարտությունը և Հյուսիսային Կորեայի շուրջ ստեղծված իրավիճակը։
Սպիտակ տան խոսնակ Օլիվիա Ուելսը, հաստատելով լրատվամիջոցների հաղորդագրությունները, հայտարարել է, որ Դոնալդ Թրամփը, Վլադիմիր Պուտինը և Սի Ծինփինը կհանդիպեն հինգշաբթի՝ նոյեմբերի 19-ին, Շենժենում կայանալիք Ասիա-խաղաղօվկիանոսյան տնտեսական համագործակցության (APEC) ամենամյա համաժողովի շրջանակներում։
Նրա խոսքով՝ այս երկրների առաջնորդների միջև առաջին եռակողմ հանդիպման հիմնական թեման կլինի միջուկային զենքի վերահսկողության վերաբերյալ համապարփակ համաձայնագրի մշակումը։
Մեկ այլ ամերիկացի պաշտոնյայի խոսքով՝ Ուկրաինայի պատերազմի ավարտը, հավանաբար, չի քննարկվի առաջնորդների կողմից հանդիպման ժամանակ. «Չինաստանը այս գործընթացի կողմ չէ, ուստի այստեղ Ուկրաինայի հարցը քննարկելը տեղին չէ»։ Նա նաև նշել է, որ Պուտինի և Թրամփի միջև երկկողմ հանդիպում նախատեսված չէ։
Հոկտեմբերին The Wall Street Journal-ը հայտնել էր, որ Պուտինը առաջարկել է Թրամփի և Սի Ծինփինի միջև եռակողմ հանդիպում անցկացնել Չինաստանում կայանալիք ԱԽՏՀ ֆորումի ժամանակ։
Նշվել է, որ Ռուսաստանի առաջնորդը ցանկանում է քննարկել Ուկրաինայի դեմ Ռուսաստանի պատերազմի ավարտի պայմանները այս ձևաչափով՝ առանց Եվրամիության և Կիևի ներկայացուցիչների մասնակցության։
Թրամփը հայտարարել է, որ պատրաստ է նման հանդիպում անցկացնել, բայց կցանկանար այնտեղ քննարկել միջուկային զինաթափման հարցերը, այլ ոչ թե Ուկրաինայում պատերազմը։