ՄԻԵԴ-ն ապօրինի է ճանաչել Անի Հովհաննիսյանի կալանավորումը

Thu, 26 Feb 2026 19:53:55 +0400

2016 թվականին ես հետապնդվեցի օրվա իշխանությունների կողմից և դեռ առաջին օրը Քննչականում, ապա ՀՔԾ-ում, շատ լավ հիշում եմ վարչության պետ կար Կարեն Կարապետյան անունով, ով ինձ վախեցնում էր, որ եթե ինքնակամ չընդունեմ չարածս արարքն, ապա ինձ 15 տարով կդատապարտեն, մեկ ա որոշողն իրենք են, ասացի, որ որևէ պարագայում չեմ ընդունելու մի բան, ինչը չեմ արել ու պայքարելու եմ մինչև վերջ: Անցել է 10 տարի, ես չգիտեմ էլ, թե ուր է հիմա այդ շինծու գործը քննող ու սարքելուն նպաստող քննիչ Ալիկ Ստեփանյանը, վարչության պետ Կարեն Կարապետյանը, այդ պատմության մեջ որպես գործիք ծառայած Տիգրան Ուրիխանյանն, ում կանդրադառնամ դեռ, տեսնում եմ՝ մոռացել է անցյալն ու ինչ-որ «փրկչական» գործունեություն է ծավալում, չգիտեմ ուր է այդ ժամանակ գլխավոր դատախազ Գևորգ Կոստանյանն, ապա Արթուր Դավթյանը, ներքին համոզմունքի հիման վրա ինձ անարդարացիորեն դատած դատավոր Արշակ Վարդանյանն, ուր են ՀՀԿ-ական պաշտոնյաներն ու Սերժ Սարգսյանն, ում մշտապես նամակներ էի ուղարկում ապօրինի կալանքիս ընթացքում՝ հորդորելով դադարեցնել իմ նկատմամբ իրականացվող անարդարությունն ու ապօրինի հետապնդումը:

Իրենք չգիտեմ ուր են, ես 10 տարի անց էլ իմ տեղում եմ ու արդեն ունեմ 1 հաղթանակ՝ կալանքի մասով վճիռ ՄԻԵԴ-ից՝ իմ նկատմամբ կիրառված կալանքն ապօրինի է ճանաչվել: Ես շարունակում եմ պայքարել, դեռ սպասում եմ ամբողջ գործի մասով ՄԻԵԴ վճռին, մինչ այդ աջակցելու եմ բոլոր նրանց, ում կփորձեն ապօրինի հետապնդել, կալանավորել, սահմանափակել խոսքի ազատությունն՝ անկախ նրանից, թե ովքեր կլինեն և ով կլինի իշխանության:

Հիմա էլ հորդորում եմ այսօրվա իշխանություններին վերջ տալ մարդկանց հանուն քաղաքական նպատակների, ճնշելու կամ անձնական վրեժխնդրության համար բանտ ուղարկելու ստորաքարշ և արատավոր պրակտիկային: Սա պետք է վերանա մեր երկրում:
Հոգաչափ շնորհակալ եմ իմ փաստաբան Լիպարիտ Սիմոնյանին , առանց նրա մասնագիտական գիտելիքների, կամային և մարդկային բարձր արժեքների գրեթե անհնար կլիներ իմ պայքարը։

Անի Հովհաննիսյանի ֆեյսբուքյան էջից