ԱՄՆ-ն հարստացված ուրանը Իրանից «առգրավելու» օպերացիա է մշակում

Mon, 09 Mar 2026 16:00:34 +0400

Միացյալ Նահանգներում ուսումնասիրում են Իրան հատուկ նշանակության ուժեր ուղարկելու հնարավորությունները՝ այնտեղ պահպանվող բարձր հարստացվածության ուրանը առգրավելու համար։ Սակայն, ամերիկյան վարչակազմում վստահ չեն, թե արդյոք հստակ են տիրապետում այն ինֆորմացիային, թե որտեղ է այդ ուրանը պահվում։ Չի բացառվում, որ իրանական կողմն իր բարձր հարստացվածության ուրանի պաշարը լրիվ այլ տեղ է պահում, քան գիտեն ամերիկյան եւ իսրայելական հատուկ ծառայությունները։ Bloomberg-ի հաղորդմամբ՝ իրենց հանրային հայտարարություններում՝ ամերիկացի պաշտոնյաները ամեն կերպ ցույց են տալիս, որ ամերիկյան կողմին հայտնի է, թե որտեղ են պահվում իրանական ուրանի պաշարները։

Սակայն մասնավոր զրույցներում եւ աշխատանքային փակ քննարկումներում նրանք կասկածներ ունեն, թե արդյոք այդ առնչությամբ ունեցած իրենց ինֆորմացիան հավաստի է։ Ներկայումս ամերիկյան եւ իսրայելական հետախուզական ծառայությունները փորձում են վերջնական պարզել, թե որտեղ են պահվում իրանական ուրանի պաշարները ու եթե կարողանան դա անել, հնարավոր է, որ հատուկ նշանակության ուժեր ուղարկեն Իսլամական Հանրապետություն՝ այն առգրավելու համար։ Axios-ն էլ գրել է, որ ամերիկյան վարչակազմում երկու հիմնական սցենար է քննարկվում Իրանից բարձր հարստացվածության ուրանի առգրավման համար։ Դրանցից մեկը՝ այդ պաշարի դուրս բերումն է Իսլամական Հանրապետության տարածքից, մյուսը՝ ոլորտի գիտնականների օգնությամբ՝ «վնասազերծումը»։