Նահանջ չի լինելու

Tue, 08 Sep 2026 12:42:40 +0400

ԱԺ «Հայաստան» խմբակցության պատգամավոր Լևոն Քոչարյանը հայտարարել է, որ իրենց քաղաքական թիմը, անկախ հարուցվող քրեական գործերից կամ այլ ճնշումներից, չի պատրաստվում հրաժարվել իր որդեգրած ուղուց։

Լրագրողների հետ հանդիպման ժամանակ նա ընդգծել է, որ իրենց պայքարի հիմքում անձնական շահը կամ հանգիստ ու ապահով կյանք ունենալու ցանկությունը չէ։ Նրա խոսքով՝ եթե նման նպատակ լիներ, իրենք չէին հայտնվի ստեղծված իրավիճակում և կընտրեին ավելի հարմարավետ կյանք։

Քոչարյանի խոսքով՝ իրենց որոշումների հիմքում հայրենիքի նկատմամբ պատասխանատվությունն ու համոզմունքն են, որ Հայաստանը այն երկիրն է, որտեղ իրենք պետք է ապրեն, աշխատեն և ապագան կառուցեն։ Նա նշել է, որ հատկապես սեփական երեխաների ապագայի մասին մտածելն է այդ պատասխանատվությունը դարձնում առավել կարևոր։

Պատգամավորի գնահատմամբ՝ նման իրավիճակում տարբեր ճնշումներն ու խնդիրները երկրորդ պլան են մղվում, քանի որ առաջնայինը մնում է երկրի և սեփական սկզբունքների համար պայքարը։

Լևոն Քոչարյանը նաև ընդգծել է, որ իրենց թիմը գործնականում արդեն ցույց է տվել՝ չի պատրաստվում ենթարկվել ճնշումների և նահանջել իր դիրքորոշումներից։