Ալիև-Փաշինյան շփում, Հայ-ադրբեջանական տեխնիկական հանդիպում Գորիսում․ օրվա թոփ նորությունները

Thu, 08 Oct 2026 23:09:21 +0400

Հոկտեմբերի 8-ին մեդիա-օրակարգը բաժանված է եղել երկու հիմնական թեմայի շուրջ քննարկումների միջև։ Առաջինը՝ վարչապետ Նիկոլ Փաշինյանի այցն էր Թուրքմենստան՝ ԱՊՀ գագաթնաժողովին, այդ թվում Իլհամ Ալիևի հետ ոչ պաշտոնական շփումը։ Մյուսը Շաքիի միջադեպի շարունակությունն էր՝ վարչապետի ճեպազրույցից հետո։ Օրվա ընթացքում ուսումնասիրվել է 2,957 նյութ, որոնց ցերլուծությունն իրականացվել է մեդիա մոնիտորինգ հարթակի վերլուծական գործիքակազմով։

ՕՐՎԱ ԹՈՓ ՆՈՐՈՒԹՅՈՒՆՆԵՐԸ

1. Փաշինյանի այցը Թուրքմենստան և ԱՊՀ գագաթնաժողովը — 113 հիշատակում

Փաստեր. Վարչապետ Նիկոլ Փաշինյանը երկօրյա աշխատանքային այցով մեկնել է Թուրքմենստան՝ մասնակցելու ԱՊՀ անդամ պետությունների ղեկավարների խորհրդի նիստին Թուրքմենբաշի քաղաքում։ Այնտեղ նա առանձնազրույցներ է ունեցել Թուրքմենստանի նախագահ Սերդար Բերդիմուհամեդովի և Ուզբեկստանի նախագահ Շավքաթ Միրզիյոևի հետ։ Միրզիյոևի հետ զրույցում կարևորվել են առևտրատնտեսական կապերը, և երկուստեք ընդգծվել է Հայաստանի և Ադրբեջանի միջև խաղաղության հաստատումը։ ԱՊՀ առաջնորդների հետ վարչապետն այցելել է Ավազա զբոսաշրջային գոտում բացված մշակույթի և ազգային ուտեստների փառատոն, որին Հայաստանը մասնակցում էր առանձին տաղավարով։ Մեկնելուց առաջ Փաշինյանն ասել էր, որ Վլադիմիր Պուտինի և Իլհամ Ալիևի հետ պաշտոնական հանդիպումներ նախատեսված չեն, սակայն շփումներ կլինեն։

Մեդիայի ուշադրության կենտրոնում. Լրահոսում ամենաշատ քննարկվել են սոցցանցերում հայտնված կադրերը Փաշինյանի և Ալիևի ոչ պաշտոնական շփումից։ Լրատվամիջոցները այն կապել են Շաքիում ձերբակալված ադրբեջանցի զինծառայողի հարցի հետ։

2. Շաքիի միջադեպը. վարչապետի ճեպազրույցն ու արձագանքները — 109 հիշատակում

Փաստեր. Կառավարության նիստից հետո ճեպազրույցում Փաշինյանը հայտարարել է, որ Ադրբեջանը զինծառայողին արտահանձնելու պահանջ չի ներկայացրել։ Նրա խոսքով՝ Ադրբեջանն էլ է քրեական գործ հարուցել, և եթե զինծառայողը հայտնվի Ադրբեջանում, նրան այնտեղ կդատեն։ «Մի քանի հանցագործություն է արել, բայց կուլմինացիան մեր քաղաքացու վրա կրակելն է»,- ասել է վարչապետը և ավելացրել, որ եթե զինծառայողը չկրակեր, հայկական կողմը նույն օրը նրան կվերադարձներ։ ՔՊ պատգամավոր Արմեն Խաչատրյանը չի բացառել, որ դատավճռից և պատիժը կրելուց հետո զինծառայողը կարող է հանձնվել գերիների վերադարձի դիմաց, բայց նշեց, որ դրա մասին խոսելը վաղ է։

Տուժած Անի Ավետիսյանի ամուսնու խոսքով՝ կինը տեղափոխվել է հիվանդասենյակ, իսկ վիրահատության ընթացքում կատարվել է մատի անդամահատում և ոտքի կրճատում։

Մեդիայի ուշադրության կենտրոնում. Ամենաշատ արձագանքը ստացել է Փաշինյանի համեմատությունը. «Ռոբերտ Քոչարյանն էլ է հանցագործ, ադրբեջանցի զինվորն էլ է հանցագործ», նույն կերպ նա հիշատակել է Գագիկ Ծառուկյանին և Սամվել Կարապետյանին։ Առանձին թեմա էր Անի Ավետիսյանի առողջական վիճակը։

Հակասող նարատիվներ.

• Իշխանական. Միջադեպը չի վտանգում խաղաղության գործընթացը, արտահանձնման թեմա չկա, իսկ զինծառայողը ենթակա է հայկական արդարադատությանը։
• Ընդդիմադիր. «Հայաստան» խմբակցության պատգամավոր Լևոն Քոչարյանը հայտարարել է, որ Շաքիում տեղի ունեցածը չի կարող համարվել սովորական քրեական դեպք, իսկ ՀՀ երկրորդ նախագահ Ռոբերտ Քոչարյանի գրասենյակի ղեկավար Բագրատ Միկոյանն ասել է, որ Քոչարյանի օրոք ադրբեջանցի զինվորները Հայաստանով «գուլյատ» չէին լինում։ «Ուժեղ Հայաստանի» պատգամավոր Տիգրան Աբրահամյանը պնդել է, որ իշխանությունը «ամեն ինչ անելու է», որպեսզի թեման լղոզվի։

3. Ժանտախտի կանխարգելում — 49 հիշատակում

Փաստեր. Վարչապետի որոշմամբ ստեղծվել է հանձնաժողով, որը պետք է համաձայնեցնի ՌԴ Իրկուտսկի մարզից Հայաստան ժանտախտի թափանցման և տարածման կանխարգելման միջգերատեսչական միջոցառումները։ Հանձնաժողովի տեխնիկական սպասարկումը կապահովի Առողջապահության նախարարությունը՝ Հիվանդությունների վերահսկման և կանխարգելման ազգային կենտրոնի մասնակցությամբ։ Նույն օրը «Ռոսպոտրեբնադզորը» հերքել է Իրկուտսկում ժանտախտի հետազոտական կենտրոնի աշխատակցի մահից հետո նոր դեպքի մասին տեղեկությունները՝ նշելով, որ շփում ունեցած անձանց մոտ վտանգավոր հարուցիչներ չեն հայտնաբերվել։

Մեդիայի ուշադրության կենտրոնում. Լրահոսում զուգահեռ ներկայացվել են հայկական կողմի կանխարգելիչ քայլերը և ռուսական կողմի հերքումները։ Ոչ պաշտոնական տեղեկությունները, թե աշխատակիցը վարակվել է լաբորատորիայում, «Ռոսպոտրեբնադզորը» հերքել է՝ պնդելով, որ նա մահացել է «չպարզված թոքաբորբից»։

4. Երևան–Սևան ճանապարհին միկրոավտոբուսի կողաշրջում — 42 հիշատակում

Փաստեր. Հոկտեմբերի 8-ի առավոտյան Երևան–Սևան ավտոճանապարհի 50-րդ կմ-ին, «Սևանի գաղութի» հարևանությամբ, «Mercedes-Benz» մակնիշի միկրոավտոբուսը կողաշրջվել է։ Տուժել է 8 քաղաքացի։ Առողջապահության նախարարության տվյալներով՝ բոլորի վիճակը գնահատվել է բավարար, և նրանք դուրս են գրվել։

Մեդիայի ուշադրության կենտրոնում. Թեման լուսաբանվել է հիմնականում պաշտոնական հաղորդագրությունների հիման վրա՝ դեպքի մասին առաջին տեղեկությունից մինչև տուժածների դուրս գրվելը։

5. Հայ-ադրբեջանական տեխնիկական հանդիպում Գորիսում — 39 հիշատակում

Փաստեր. Հոկտեմբերի 8-ին Գորիսում տեղի է ունեցել Հայաստանի և Ադրբեջանի համապատասխան կառույցների ներկայացուցիչների տեխնիկական հանդիպում։ Ըստ ՏԿԵ նախարարության՝ այն նվիրված էր TRIPP նախագծի շրջանակում էլեկտրահաղորդման գծերի տեղակայման հարցերին։ Կողմերը քննարկել են տեխնիկական հարցեր, կառույցների միջև համակարգումը և աշխատանքների առաջմղման հետագա քայլերը։ Հանդիպման մասին ավելի վաղ հաղորդագրություն էր տարածել նաև Ադրբեջանի նախարարների կաբինետը։

Մեդիայի ուշադրության կենտրոնում. Լրատվամիջոցները գրեթե նույնությամբ վերահրապարակել են ՏԿԵ նախարարության հաղորդագրությունը։

ՕՐՎԱ ԹՈՓ ՆՅՈՒԶՄԵՅՔԵՐՆԵՐԸ

1. Նիկոլ Փաշինյան (վարչապետ) — մեկնել է ԱՊՀ գագաթնաժողով, իսկ ճեպազրույցում հայտարարել, որ Ադրբեջանը զինծառայողի արտահանձնում չի պահանջել, և արձագանքել Դմիտրի Մեդվեդևի՝ Հայաստանի «ուկրաինացման» մասին հայտարարությանը. «Հայաստանը արդեն եղել է նման վտանգի առջև»։
2. Դոնալդ Թրամփ (ԱՄՆ նախագահ) — հայտարարել է, որ «կարգավորել է ութ պատերազմ», և խոստացել մինչև միջանկյալ ընտրությունները չհարձակվել Իրանի վրա։
3. Իլհամ Ալիև (Ադրբեջանի նախագահ) — Թուրքմենստանում ոչ պաշտոնական շփում է ունեցել Փաշինյանի հետ և այցելել ազգային ուտեստների փառատոն, այդ թվում հայկական տաղավար։
4. Վլադիմիր Պուտին (ՌԴ նախագահ) — մասնակցել է ԱՊՀ գագաթնաժողովին, որտեղ, Դմիտրի Պեսկովի խոսքով, «ոտքի վրա» զրուցել է Ալիևի և հանդիպել Իրանի նախագահ Մասուդ Փեզեշքիանի հետ։
5. Տիգրան Աբրահամյան («Ուժեղ Հայաստան» պատգամավոր) — պնդել է, որ իշխանությունը փորձելու է «լղոզել» ադրբեջանցի զինծառայողի թեման, և ԱԺ հարցուպատասխանում թվարկել, թե ինչ զիջումներ է, ըստ ընդդիմության, արել իշխանությունը։

ԿԱՐԵՎՈՐ ՆՈՐՈՒԹՅՈՒՆՆԵՐ, ՈՐՈՆՔ ԹՈՓՈՒՄ ՉԵՆ

• Դատախազության հայցեր. Գլխավոր դատախազությունը Հակակոռուպցիոն դատարանում պահանջում է բռնագանձել Տիգրան Մեծի պողոտա 16 հասցեի գույքի վրա (նախկին «Այրարատ» կինոթատրոն), ինչպես նաև անվավեր ճանաչել Աբովյան 8/1 հասցեի գույքի 2001 թ. մասնավորեցման պայմանագիրը և այն ազատել «Ֆոքսֆորդ» ՓԲԸ-ի տիրապետումից։
• Կաթողիկոսի եղբայրը. Արմավիրի մարզի դատարանը մեղադրական վերդիկտ է կայացրել Գարեգին Բ-ի եղբոր՝ Գևորգ Ներսիսյանի և նրա որդու՝ Համբարձում Ներսիսյանի գործով։
• Մեդվեդև–Փաշինյան. ՌԴ ԱԽ փոխնախագահ Դմիտրի Մեդվեդևը խոսել է Հայաստանի «ուկրաինացման» վտանգի մասին. Փաշինյանը պատասխանել է, որ ՀԱՊԿ-ն չի կատարել իր դաշնակցային պարտավորությունները, և հարցրել՝ «այդ կսմիթները, սպառնալիքները ինչի՞ համար են»։
• ԱՄՆ Կոնգրես. Ավելի քան 100 սենատոր և կոնգրեսական պետքարտուղար Մարկո Ռուբիոյին կոչ են արել դադարեցնել ռազմական աջակցությունը Ադրբեջանին։
• Firebird տվյալների կենտրոն. ՌԴ ԱԽ քարտուղարի տեղակալ Ալեքսեյ Շևցովը զգուշացրել է, որ Հրազդանում բացված արհեստական բանականության տվյալների կենտրոնը կարող է օգտագործվել արևմտյան հատուկ ծառայությունների կողմից։
• Զորակոչ. Կառավարությունը հավանություն է տվել նախագծի, որով տարկետում ստացածների համար զորակոչի ենթակա լինելու տարիքային շեմը կլինի 32 տարեկան։
• Բնակարանային աջակցություն. Երեխա ունեցող ընտանիքների բնակարանային ծրագրերի համար լրացուցիչ 500 մլն դրամ կհատկացվի։
• Անհետ կորածներ. «Ուժեղ Հայաստան» խմբակցությունը ԱԺ-ում հանդիպել է անհետ կորած և զոհված զինծառայողների ծնողների հետ։
• Ռուսական երկաթուղիներ. Փաշինյանի խոսքով՝ հաջորդ շաբաթ Հայաստան կժամանի «Ռուսական երկաթուղիների» նախագահը՝ աշխատանքային քննարկման համար։

ԱՅԼ ՆՈՐՈՒԹՅՈՒՆՆԵՐ

• Գրականության 2026 թ. Նոբելյան մրցանակը շնորհվել է կանադացի բանաստեղծ, թարգմանիչ Անն Քարսոնին։
• Օլիմպիական չեմպիոն Արթուր Ալեքսանյանը վնասվածքի պատճառով բաց կթողնի Աստանայում կայանալիք ըմբշամարտի աշխարհի առաջնությունը. նրան կփոխարինի Հայկ Խլոյանը։
• Լիոնել Մեսին հրաժեշտի խոսք է ասել Արգենտինայի հավաքականին. նրան դիմել է նաև Կրիշտիանու Ռոնալդուն։
• Ամենայն Հայոց Կաթողիկոսն ընդունել է Միլանից ժամանած կաթոլիկ ուխտավորների։