Սկանդալ՝ Apple-ում․ ի՞նչ է կատարվում նոր iPhone-ի հետ

Tue, 27 Oct 2026 20:15:30 +0400

Apple-ի նոր ծալվող սմարթֆոնը հայտնվել է քննադատության կենտրոնում։ Համացանցի տարբեր հարթակներում օգտատերերը լուսանկարներ են հրապարակում՝ պնդելով, որ իրենց նոր հեռախոսների էկրանները վնասվել են օգտագործման կարճ ժամանակահատվածում։ Որոշ դեպքերում վնասվածքները նկատվել են էկրանի ծալման հատվածում։

Հրապարակված լուսանկարներում երևում են էկրանի վրա առաջացած գծեր, լուսավոր կետեր և այլ վնասվածքներ։ Օգտատերերից մեկը, մասնավորապես, հայտնել է, որ հեռախոսը ձեռք բերելուց ընդամենը մի քանի ժամ անց էկրանին խնդիր է նկատել։ Նրա խոսքով՝ սարքը մինչ այդ ընդամենը մի քանի անգամ էր բացել ու փակել։ Ավելի ուշ, օգտատիրոջ պնդմամբ, Apple-ի խանութում հեռախոսը փոխարինվել է։

Նմանատիպ բողոքներ են հայտնվել նաև այլ երկրներից։ Այնուամենայնիվ, առայժմ հայտնի չէ, թե որքան տարածված է խնդիրը, և արդյոք բոլոր դեպքերը պայմանավորված են արտադրական թերություններով։ Սոցիալական ցանցերում հրապարակված լուսանկարներն ու առանձին օգտատերերի պատմությունները դեռ բավարար չեն՝ եզրակացնելու, որ սարքերի ամբողջ խմբաքանակն ունի նույն խնդիրը։

Խնդիրն առանձնահատուկ ուշադրության է արժանացել, քանի որ ծալվող հեռախոսների ամենազգայուն բաղադրիչներից մեկը հենց էկրանն է։ Դրա ամրությունն ու երկարատև օգտագործման ընթացքում դիմացկունությունը նման սարքերի որակը գնահատելու կարևոր չափանիշներից են։

Առաջիկայում պարզ կդառնա՝ արդյոք արձանագրված դեպքերը եզակի միջադեպեր են, թե Apple-ի նոր սարքի հուսալիության հետ կապված ավելի լուրջ խնդիր կա։ Մինչ այդ գնորդների բողոքները կարող են ստվեր գցել ընկերության նորարարական արտադրանքի շուրջ ստեղծված սպասումների վրա։