Նրանք, ովքեր դա արեցին, փրկվելու են

Sun, 08 Mar 2026 13:51:41 +0400

Վիտալի Բալասանյանը կասկածի տակ է դնում տարածաշրջանում ստեղծված լարված պայմաններում ընտրություններ անցկացնելու նպատակահարմարությունը։ Նրա խոսքով՝ ներկայիս իրավիճակում քարոզարշավով զբաղվելը անհասկանալի և անընդունելի է։

Բալասանյանը նշել է, որ տարածաշրջանում տիրող միջազգային և քաղաքական իրավիճակը չափազանց ծանր է և նույնիսկ «կատաստրոֆիկ» բնույթ ունի։ Նրա կարծիքով՝ նման պայմաններում դժվար է պատկերացնել, որ հնարավոր կլինի ընտրություններ կազմակերպել։

Նա նաև անդրադարձել է խաղաղության մասին հնչող հայտարարություններին՝ ընդգծելով, որ իրականում որևէ գործող փաստաթուղթ չկա։ Բալասանյանի խոսքով՝ Հայաստանի իշխանությունները խոսում են որոշակի փաստաթղթի մասին, սակայն այն նույնիսկ հուշագրի մակարդակ չունի։

Նա համոզված է, որ մոտ ապագայում քաղաքական քարտեզը կարող է փոփոխությունների ենթարկվել։ Նրա կարծիքով՝ այն ուժերն ու երկրները, որոնք արագ կկարողանան հասկանալ իրենց դերն ու տեղը նոր ձևավորվող աշխարհակարգում, ավելի հեշտ կկարողանան հաղթահարել առաջացած մարտահրավերները։

Բալասանյանը նաև ընդգծել է, որ Հայաստանը պետք է պահպանի սերտ հարաբերություններ Իրանի հետ։ Նրա համոզմամբ՝ ապագայում հնարավոր է ձևավորվի միավորող կառույց կամ դաշինք, որը որոշ չափով կհիշեցնի նախկին Խորհրդային միությանը, թեև դրա անվանումը և ձևաչափը դեռ պարզ չէ։