Ի՜նչեր չես անի ու ինչ տխմարություններ չես ասի` հանուն քվեի

Wed, 11 Mar 2026 23:09:28 +0400

Մի կարծեք, թե իշխանության ներկայացուցիչները հստակ ծրագիր ունեն և ստույգ գիտեն ինչ անել, որ ընտրողներին իրենց կողմը գրավեն: Ինչպես բոլոր հարցերում են սրանք ապաշնորհ, այնպես էլ, համոզված եղեք, փիառի ու քարոզչության: Որովհետև խելքը, կազմակերպվածությունը, ծրագրով ապրելն ու գործելը չի կարող մի հարցում դրսևորվել, մյուսում` ոչ: Այնպես որ նախընտրական քարոզչության հարցերում էլ են խարխափելով, մոտավոր աշխատում: Հույսով, որ կխփեն 10-ին, բայց 10-ից 9-ում վրիպում են: Ինչպես եղավ եկեղեցու դեմ արշավի, Ուրախ ավտոբուսի և այլ դեպքերում:

Պարզ է, որ խորհրդատուներ ունեն և միլիոններ են ծախսում փիառի վրա, բայց դրսից եկած կազմակերպությունները պետք է նաև հայի հոգեբանությունը հասկանան: Եվ մի մոռացեք, որ անհավասարակշիռ ու անկառավարելի էակի հետ գործ ունեն, ով ամեն ինչում չի որ ենթարկվում է և շատ բան նաև իրեն քննադատողների ինադու է անում:

Այդքան թքեցին, մրեցին Ալիևին շնորհակալություն հայտնելու համար, ինքը գնաց ու Ստրասբուրգում մի անգամ էլ շնորհակալություն հայտնեց այդ հրեշին: Կամ` կուկուռուզ ու պեռաշկի ուտելը քննադատեցին, գնաց Եվրոպայում ցուցադրաբար` հայերի ինադու, խնձոր կրծեց: Երևի մտածում է` մեկ էլ տեսար` ալիևասերների կամ խնձորը պոչով ու կորիզով կլլողների մի խումբ գնաց ու իրեն ձայն տվեց:
ԵԽ բարձր ամբիոնից ելույթն էլ այդ տրամաբանությամբ էր կառուցել: Ասում են` հանգիստ թող եկեղեցուն, գնում է Ստրասբուրգում հայ հոգևորականներից է բամբասում: Ասում են` Արցախի էջն իրավունք չունես փակել, արցախահայերի վերադարձի թեմային Եվրոպան դեմ չէ` կաջակցի, պետք է այդ հարցը բարձրացնել, գնում` հայտարարում է, թե արցախահայերն առհավետ պետք է հաստատվեն Հայաստանում…

Բայց ամենաուշագրավը էս ողորմելի իշխանամոլների սպառնալիք-զգուշացումներն են` մենք չլինենք, խաղաղություն չի լինի, մենք չլինենք` Թրիփ չի լինի: Այսօր էլ ֆեյքեր աշխատացնող հայտնի «վիրուսը» մի աշխարհացունց «միտք» է երկնել, թե`«Հայաստանի վարչապետին ճանապարհեցին ծափահարություններով: Ահա այսպես են ընդունում անկախ ու ինքնիշխան պետության ղեկավարին» և իր ճարպակալած ուղեղով` իբր զգուշացրել է, կամ կատակ արել, թե ինչ կլինի «եթե ձևիստների թեկնածուն վարչապետ դառնա` նրան չեն ընդունի Եվրոպական խորհրդարանում»:

Այս տգետները 8 տարի իշխանության լինելուց հետո տարրական բաներ չեն հասկացել, կամ հանրությանն են հայտնի կենդանու տեղ դնում:

Աշխարհն ընդունում է բոլոր նրանց, ում ընտրում է տվյալ երկրի ժողովուրդը: Աշխարհը նույնիսկ նրանց է ընդունում, ում չի ընտրում տվյալ ժողովուրդը, այլ ովքեր դեպքերի բերումով հայտնվում են իշխանության ղեկին (ինչպես 18-ին իր դեպքում եղավ): Աշխարհը նույնիսկ մարդասպաններին է ընդունում, ում գլխի համար դրանից առաջ փրկագին էին առաջարկել և պատերազմի հանցագործ հռչակել` ինչպես Սիրիայի ժամանակավոր նախագահ Ահմեդ Ալ Շաարան է:

Ի՜նչեր չես անի ու ինչ տխմարություններ չես ասի` հանուն քվեի…

ՀԳ․ Սիրիայի զինյալների ղեկավարը` առաջ և հետո…