Մելանյա Թրամփը «չդիմացավ»․ ուշագրավ հայտարարություն է արել
Fri, 10 Apr 2026 12:00:40 +0400
ԱՄՆ առաջին տիկին Մելանյա Թրամփը հայտարարել է, որ երբեք որևէ կերպ կապ չի ունեցել մանկապղծության համար բանտարկված ֆինանսիստ Ջեֆրի Էպշտեյնի հետ և նրա զոհերից մեկը չի եղել։
Նա այս հայտարարությունն արել է Սպիտակ տանը։
«Էպշտեյնի հետ ընկերներ չենք եղել, – ասել է ԱՄՆ նախագահի կինը, – Պարզ ասած՝ ես երբեք հարաբերություններ չեմ ունեցել Էպշտեյնի կամ նրա հանցակից [Գիսլեյն] Մաքսվելի հետ»։ Նրա խոսքով, ֆինանսիստի օգնականին ուղղված իր էլեկտրոնային նամակը պարզապես պաշտոնական պատասխան էր վերջինիս նամակին։ «Ես Էպշտեյնի զոհը չեմ», – ընդգծել է առաջին տիկինը։
Նա հերքել է, որ տեղյակ է եղել նրա հանցագործությունների մասին՝ հավելելով, որ իր և ֆինանսիստի բազմաթիվ կեղծ լուսանկարներ են շրջանառվում սոցիալական ցանցերում մի քանի տարի շարունակ։ Նա նաև հերքել է այն պնդումները, որ Էպշտեյնը իրեն ծանոթացրել է իր ապագա ամուսնու հետ։
Առաջին տիկինն ընդգծել է, որ ինքը Դոնալդ Թրամփին հանդիպել է ֆինանսիստի հետ 2000 թվականին ծանոթանալուց մեկ տարի առաջ։ «Դոնալդը և ես երբեմն հրավերներ ենք ստացել նույն երեկույթներին, ինչ Էպշտեյնը, քանի որ համընկնող սոցիալական շրջանակները սովորական երևույթ են Նյու Յորքում և Փալմ Բիչում», – հայտարարել է առաջին տիկինը։
Մելանյան Թրամփը նշել է նաև, որ ինքը Էպշտեյնի քրեական գործով վկա չէ և հավելել՝ իր անունը երբեք չի հիշատակվել տուժողների ցուցմունքներում, հարցաքննության արձանագրություններում կամ դատական փաստաթղթերում:
«Իմ դեմ կեղծ և զրպարտչական հարձակումները չարամիտ և քաղաքական դրդապատճառներով անձանց և կազմակերպությունների կողմից, որոնք ձգտում են վնասել իմ բարի համբավը՝ ֆինանսական կամ քաղաքական շահի համար, պետք է դադարեցվեն», – ընդգծել է առաջին տիկինը:
Նա շեշտել է, որ մտադիր է շարունակել պաշտպանել իր հեղինակությունը դատարանների միջոցով՝ իր փաստաբանների հետ միասին: