«Հրապարակ»․ Եթե համաձայն չեն կառավարության հետ, պետական տեղ պետք է չաշխատեն

Sat, 18 Apr 2026 10:45:24 +0400

ՔՊ-ականները՝ վարչապետից մինչեւ մանկապարտեզի դաստիարակ, ամբողջ երկրով մեկ անթաքույց նախընտրական քարոզչությամբ են զբաղված, իսկ այլ կուսակցությունների անդամներին նույնիսկ թույլ չեն տալիս իրենց կուսակցության նախընտրական շտաբ մտնել` ազատում են աշխատանքից, դա համարելով քարոզչական գործունեությամբ զբաղվել: Արդեն հայտնել ենք, որ Ծառուկյանի շտաբ գնալու համար Արարատ գյուղի Վազգեն Սարգսյանի անվան թիվ 1 միջնակարգ դպրոցի աշխարհագրության եւ ռազմագիտության ուսուցիչ Արտակ Մնացականյանին հորդորել են ազատման դիմում գրել այն բանից հետո, երբ նրան նկարել են «Առաջարկ Հայաստանին» ուժի նախընտրական շտաբ մտնելիս:

Թե ինչ զարգացումներ են եղել դրանից հետո, տեղեկացանք Արարատի բնակիչներից, որոնցից շատերը համակրում են ուսուցչին: Մնացականյանի ընկերները պատմում են, որ նա դպրոցում քարոզչություն չի արել, հարցը զուտ քաղաքական է: ԲՀԿ-ական ուսուցչի հետեւից վաղուց են ընկած եղել: Դպրոցի կոլեկտիվում այլ ընդդիմադիրներ էլ կան, բայց ՔՊ-ականներին հատկապես զինղեկ Մնացականյանն է «խանգարել», քանի որ նա նոր է ընդդիմադիր դարձել: Նախկինում եղել է զինվորական ու չի զբաղվել քաղաքականությամբ: Մոտ երկու ամիս նրան հետեւել են իսկական շպիոնաժի կանոններով ու վերջապես «կեղտ» են գտել: Անցած հինգշաբթի Արտակ Մնացականյանը հրավիրված է եղել «Առաջարկ Հայաստանին» ուժի ժողովին, հաջորդ՝ ուրբաթ օրը, գնացել է ԲՀԿ գրասենյակ, ՔՊ-ի «շպիոնները» բռնացրել են զինվորականին, նկարել, սարքել մատի փաթաթան, մարդուն ստիպել են, որ կա՛մ զեկուցագիր գրի, կա՛մ դուրս գա դպրոցից: Նա էլ նախընտրել է ազատման դիմում գրելը: Մի դիմում ուրբաթ օրն է գրել, մյուսը՝ երկուշաբթի:

Ասում են՝ «Զինղեկ» օպերացիային մասնակցել են ե՛ւ մարզպետը, ե՛ւ դպրոցի տնօրենը:
Վերջին՝ կոշտ խոսակցությունը եղել է տնօրեն Մակիչ Փանոսյանի կաբինետում: Նա Արտակ Մնացականյանին ասել է․ «Դուրս արի սենյակիցս, վերջ, դու հեռացված ես»:

Հետաքրքիր է, որ դպրոցի տնօրեն Մակիչ Փանոսյանը ՀՀԿ անդամ է, բայց ասում են՝ արդեն «լողացող» անդամ է, ՔՊ-ականների հետ կիրակի օրերին եկեղեցի է գնում եւ այլն: Մակիչ Փանոսյանը «Հրապարակի» հետ զրույցում հրաժարվեց խոսել միջադեպի մասին: Միայն ասաց. «Դպրոցում աշխտանքային ժամերին քարոզչություն իրականացնելն օրենքով է արգելվում, ես ի՞նչ պետք է ասեմ՝ ճիշտ է կամ սխա՞լ»: Շտաբ գնալը համարվում է քարոզչությո՞ւն: «Դա թող իքն ասի»,- ասաց տնօրենը:

Արարատի մարզպետ Սեդրակ Թեւոնյանի հետ հետաքրքիր զրույց ստացվեց` խոստովանություններով լի, թեեւ սկզբում պնդում էր, թե բացարձակ տեղյակ չէ ուսուցչի ազատումից:

– Նրան ազատել են ԲՀԿ-ական լինելո՞ւ համար:

– Ես տեղյակ չեմ, սկի չեմ էլ ճանաչում` ում մասին է խոսքը: Բայց բացառում եմ, որ անտեղի բան արած լինեն:

– Նա ասում է, որ դպրոցում քարոզչություն չի արել, ընդամենը իր կուսակցության շտաբ է այցելել:

– Եթե համաձայն չեն կառավարության հետ, կարծում եմ, պետական մի որեւիցե տեղ պետք է չաշխատեն ու չզբաղեցնեն որեւիցե պաշտոն: Զանգեք տնօրենին, հարցրեք:

– Ձեր դպրոցներում այլ կուսակցություններին անդամակցելու համար ազատո՞ւմ են աշխատանքից:

– Ես տենց բաներով չեմ զբաղվում, գոյություն ունի կրթության վարչություն, դպրոցի տնօրեն, իրենք են զբաղվում նման հարցերով:

– Մարզպետին չի՞ ենթարկվում աշխատակազմը, կրթության վարչությունը: Դուք չե՞ք ղեկավարում այդ վարչությունը:

– Ցավդ տանեմ, ի՞նչ է հետաքրքիր: Որեւիցե մեկը դպրոցում որեւիցե շարժ, մի հատ հանգամանք, որ մենք նկատեցինք` քաղաքական բաներ է անում, մի րոպե չի մնալու դպրոցում:

– Բայց «քաղաքական բանը» ո՞րն է: Ինչո՞ւ են ասել՝ դիմում գրի, գնա:

– Ձեր կարծիքով, ինչ որ տեղի է ունեցել, տենց պատահական մարդուն ասել են՝ բան արա՞: Խնդրում եմ, տնօրենի հետ: Ինչ որ տեղի է ունենում, ձեզ ոչ մի բան չի հետաքրքրում, էս զապիսները, մի հոգի դուրս է եկել, դա է մենակ հետաքրքրում:

Խոսեցինք նաեւ Արարատի վարչական ղեկավար Էլեն Գասպարյանի հետ, որը, լսելով Արտակ Մնացականյանի անունը, սարսափահար անջատեց հեռախոսը, ասելով․ «Կարծիք չունեմ, հաջողություն»:

Արարատի բնակիչները մարզպետին այնքան էլ չեն մեղադրում: «Մարզպետը շատ լավ տղա է, բայց ՔՊ-ական է»,- ասում են նրանք: Համայնքապետի մասին էլ ասում են` նա ի՞նչ կարա անի: «Էսօր էդ համայնքապետեր, վարչական ղեկավարներն էնքան իմպոտենտ կառույցներ են: Իրանք Նիկոլի քարտեզը հազիվ դոշներին խփած ման են գալիս: Էն, որ մեր բակի Հրանտը, որ ախրաննիկի ռացիան է կպցնում, ման գալիս, ասում են՝ էս ի՞նչ թիթեռ ա նստել ձեր դոշին, հիմա սրանք են: Չնայած, ավելի լավ էր՝ թիթեռ խփեին դոշներին, քան մեր հայրենիքը պղծեին»,- այսպիսի արարատցիներ էլ կան, որոնք իրենց անունով չեն խոսում:

Արտակ Մնացականյանը «Հրապարակի» հետ զրույցում ասաց, որ ի պաշտոնե մինչեւ 16:00-ն պետք է լինի դպրոցում, ինքը միշտ ժամը 4-ից հետո է գնացել շտաբ: «Մի անգամ եմ ընդամենը մինչեւ չորսը գնացել, տնօրենին էլ ասել եմ, դա սարքել են բոլոլա: Ինձ չեն խնդրել դիմում գրել, բայց ոչ պաշտոնական խողովակով տեղյակ են պահել, որ հեռանամ»: Ասաց, որ շատ ակտիվ է, շատ հայրենասեր, երբեք չի վախեցել երեխաներին ասել՝ Մասիսը մերն է, Արագածի ցավն էլ տանեմ: Ինչով է զբաղվելու` դեռ չգիտի: Երազում է, որ հունիսի 8-ից հետո զարթնենք նոր Հայաստանում, բայց քաղաքականությամբ չի զբաղվել դպրոցում, բարձր դասարանցիներին էլ ասել է՝ ինձ քաղաքական հարցեր չտաք: