Ձգձգում են. վաղեմության ժամկետը կլրանա

Mon, 27 Apr 2026 13:45:09 +0400

Իրավապաշտպանները մտահոգիչ են համարում այն իրավիճակը, երբ հանրային նշանակություն ունեցող տեղեկատվությունը չի հասանելի դառնում հասարակությանը։ Այս մասին խոսվեց «Քաղաքական իրավունքների հայկական կենտրոնի» զեկույցի ներկայացման ընթացքում, որը վերաբերում էր Սոնա Մնացականյանի մահվան գործին և անցած չորս տարիներին տեղի ունեցած զարգացումներին։

Իրավապաշտպան Մարիամ Կանայանը ընդգծեց, որ դեպքի քննության ընթացքում որպես վկաներ ներգրավված ոստիկանները ներկայացրել են միմյանց հակասող ցուցմունքներ, ինչը լրացուցիչ հարցեր է առաջացնում գործի ընթացքի վերաբերյալ։

Կազմակերպության նախագահ Ռաֆայել Իշխանյանն իր հերթին նշեց, որ դատական գործընթացը շարունակ ձգձգվում է, մինչդեռ գործի վաղեմության ժամկետը մոտենում է ավարտին։ Նրա խոսքով՝ 2027 թվականի ապրիլին կլրանա քրեական պատասխանատվության ժամկետը, այսինքն՝ գործի շրջանակում որոշում կայացնելու համար մնացել է ընդամենը մեկ տարի։

Իշխանյանը նաև ընդգծեց, որ խոսքը լայն ընդգրկում ունեցող գործընթացի մասին է, որտեղ առկա են շահեր, կապված բարձր պաշտոն զբաղեցնող անձանց հեղինակության և նրանց ենթակաների պատասխանատվության հետ։ Նրա գնահատմամբ՝ նման պայմաններում բախվում են երկու տարբեր շահեր՝ մեկ կողմից պետական համակարգի ներսում առկա ազդեցությունները, մյուս կողմից՝ Սոնա Մնացականյանի իրավահաջորդների արդարության հասնելու ակնկալիքը։

Իրավապաշտպանների կարծիքով՝ երբ պարբերաբար արձանագրվում է մարդու իրավունքների և արդար դատաքննության վիճակի վատթարացում, արդարադատության համակարգը սկսում է աստիճանաբար կորցնել իր արդյունավետությունն ու վստահելիությունը հասարակության աչքում։