Հոսանքի հարցը լուծեցին

Tue, 28 Apr 2026 22:45:49 +0400

ՀԷՑ ղեկավարությունը, արձագանքելով «Հրապարակի» հոդվածին, /hraparak.am/ լուծել է Արցախից տեղահանված բազմազավակ մոր խնդիրը՝ հոսանք է անցկացրել նրա «դոմիկ»։

33- ամյա կինը՝ Կարինե Միրզախանյանն իր երկու երեխաների հետ, հիշեցնենք, բնակվում է Չարենցավանում, երկաթյա տնակում, որտեղ ոչ հատակ կա, ոչ պատուհան, ոչ առաստաղ, ոչ էլ հոսանք: Երրորդ երեխան խնամքի հաստատությունում է։ Երեխաներին նա լողացնում էր հարևանների տանը, քանի որ պայմաններ չկային։

Առհասարակ, նրան օգնում են գոյատեւել Չարենցավանի բնակիչները, քանի որ մաքրուհու վաստակած գումարը բավարար չէ երեխաներին պահելու համար։ Կարինե Միրզախանյանը երեխաների հետ Հայաստան է եկել 2020 թվականին:

Արդեն գրել ենք, որ նա Մարտունու շրջանում է ապրել, ապա փախել է Ստեփանակերտ, ի վերջո՝ Չարենցավան։ Պետական աջակցության ծրագրերից կինը զրկված է, քանի որ սոցապի բազաներում փաստաթղթավորման թերությունների պատճառով նրա վերաբերյալ տվյալներ չկան։