Հայաստանն ու Վրաստանը կհյուրընկալեն Ֆուտբոլի աշխարհի 2029 թվականի երիտասարդական առաջնությունը

Thu, 30 Apr 2026 14:29:51 +0400

Հայաստանն ու Վրաստանը համատեղ կհյուրընկալեն ֆուտբոլի մինչև 20 տարեկանների աշխարհի առաջնությունը, որը նախատեսվում է անցկացնել 2029 թվականին։ Սա տարածաշրջանի համար կարևորագույն մարզական իրադարձություններից մեկն է, որն ակնկալվում է մեծ հետաքրքրություն առաջացնել թե՛ երկրպագուների, թե՛ միջազգային հանրության շրջանում։

Կրթության, գիտության, մշակույթի և սպորտի նախարար Ժաննա Անդրեասյանը կառավարության նիստի ընթացքում նշել է, որ մրցաշարի անցկացումը նախնական ծրագրով նախատեսված է սեպտեմբեր-հոկտեմբեր ամիսներին։ Նրա խոսքով՝ այդ ժամանակահատվածում Հայաստանը կհյուրընկալի ավելի քան 100 հազար ֆուտբոլասերի։

Նախարարի գնահատմամբ՝ այս առաջնությունը իր նշանակությամբ երկրորդն է ֆուտբոլի մեծահասակների աշխարհի առաջնությունից հետո։ Թեև ծրագիրը դեռ վերջնական չէ և կարող է փոփոխությունների ենթարկվել, արդեն իսկ նախանշված է խաղերի բաշխման մոտավոր պատկերը։ Մասնավորապես՝ Երևանում նախատեսվում է անցկացնել մինչև 20 հանդիպում, իսկ Վանաձորում և Իջևանում միասին՝ շուրջ 10 խաղ։