Մեկ մարդ հիվանդանոցում է. մասսայական թունավորման հետքերով

Fri, 01 May 2026 20:45:40 +0400

Գրել էինք, որ օրեր առաջ մասսայական թունավորման դեպք է տեղի ունեցել Բյուրեղավան համայնքում։ Արձանագրված աղիքային վարակիչ հիվանդության դեպքերից հետո խմելու ջրի նմուշներում հայտնաբերվել են կոլիֆորմ մանրէներ, հայտնել է ՀՎԿԱԿ-ը։

Կենսաբանական նմուշների հետազոտություններով հայտնաբերվել են ռոտավիրուս, ադենովիրուս, ինչպես նաև էնտերոհեմորագիկ և էնտերոախտածին կոլի խմբի ախտածիններ։

Բյուրեղավանի պոլիկլինիկայի տնօրեն Արմեն Վարդումյանը Հրապարակի հետ զրույցում հայտնեց, որ մարդիկ դեռ ծորակի ջուրը չեն խմում կամ խմում են եռացնելուց հետո. «Մեկ մարդ շարունակում է ստացիոնար բուժում ստանալ, սակայն կյանքին վտանգ չի սպառնում։ Այս պահին էլ շատ քիչ, բայց կանչեր ստանում ենք։ Ուզում եմ շեշտել, որ ռոտավիրուսով վարակման դեպքեր ունեինք, բայց երեխաների շրջանում 1-2 դեպք էր։ Սա պայմանավորված է պատվաստումների հետ։ Ովքեր երեխաներին պատշաճ պատվաստել էին՝ չեն վարակվել։ Այս ընթացքում թունավորում ստացած քաղաքացիների թիվը շատ մեծ է եղել, հարյուրավոր մարդիկ են տուժել»,- ասաց նա։

Հարցին` ի՞նչ պայմաններում է ջուրը վարակվել, Վարդումյանը արձագանքեց. «Գլխավոր վարկածը կոյուղու հետ խառնվելն է, բայց կարող է նաև ջրանջատման ժամանակ անձրևաջրերը խառնված լինեն, բայց որ խմելու ջրից է եղել խնդիրը, դա հաստատվել է։ Այս պահին էլ բնակիչներին հորդորում ենք ջուրը միայն կենցաղում օգտագործեն։ Իրավական գործընթաց է սկսվել Վեոլիա Ջրի դեմ, տեսնենք ինչ կլինի։ Կարևորը համաճարակային իրավիճակը մարվել է»։