Ուրբաթ , 20 Նոյեմբերի 2026

Ծառուկյան VS Թաթոյան

Ծառուկյան VS Թաթոյան

Fri, 15 May 2026 18:45:23 +0400


10-ականների սկզբին տեր­պետրոսյանական շարժման համակիրներից էի, դադարեցրել եմ, երբ ՀՀ առաջին նախագահը հայտարարեց Գագիկ Ծառուկյանի օգնությամբ բուրժուա-դեմոկրատական հեղափոխություն իրականացնելու մասին: Քանի որ նախկինների օրոք Հանրապետականի հետ մեկտեղ քննադատել եմ նաեւ ԲՀԿ-ին ու չեմ ընդունել ամենահզոր օլիգարխի հետ տերպետրոսյանական «գաղափարական» մերձեցման տեսլականը: Հետո եկան 2018-ի գարնանային օրերը, այնուհետեւ՝ 44-օրյա պատերազմի խայտառակ պարտությունը: Իսկ այսօր կանգնած ենք Ազգային ժողովի՝ հետպատերազմյան երկրորդ ընտրության շեմին: Ու եթե չլիներ «Ուժեղ Հայաստան»-ի հայտնությունը, կկանգնեի երկընտրանքի առջեւ, թե ում տալ այս անգամ ձայնս: Որովհետեւ 2021-ին Նիկոլին պարտված Քոչարյանը կամ նրա «Հայաստան» դաշինքը, որին տվել եմ ձայնս, հաստատ այս անգամ էլ չի կարողանալու միայնակ հաղթել Նիկոլին եւ հավաքելու է ավելի պակաս քվե:

Եվ երկընտրանքն Արման Թաթոյանի «Միասնության թեւեր»-ի ու Ծառուկյանի «Բարգավաճ Հայաստան»-ի միջեւ էր լինելու: Ասեմ, որ դժվարլուծելի երկընտրանք էր լինելու: Քանի որ ԲՀԿ-ի ցուցակի առաջին համար Գագիկ Ծառուկյանը հրաժարվում է հայտարարել, որ ինքն է լինելու վարչապետի թեկնածուն, ասում է` 3-4 թեկնածու ունենք, սակայն Ծառուկյանենք այս անգամ լուրջ մակարդակով են պատրաստվել ընտրություններին՝ մշակելով «Առաջարկ Հայաստանին» ծրագիրը, ինչի դրույթներն ավելի քան 80 տոկոսով համապատասխանում են իմ պատկերացումներին՝ նոր իշխանության անելիքների մասին: Այդ մասին տեղեկացա Ֆեյսբուքում Արփինե Հովհաննիսյանի գովազդած VoteArmenia-ի (ՎոութԱրմենիա) կայքէջի 30 հարցին պատասխանելով: Դրանից այնքան էլ չզարմացա, քանի որ, ինչպես նշեցի, այս ընտրության առումով կուսակցական մասնագետների խումբը կատարել էր շատ լուրջ աշխատանք:

Միաժամանակ առկա է Արման Թաթոյանի հանգամանքը, որը 2022-ին, երբ լքում էր ՄԻՊ պաշտոնը, ուներ բացարձակ վստահություն հանրության շրջանում, սակայն գերադասեց զբաղվել գիտամանկավարժական գործունեությամբ Ամերիկյան համալսարանում: Եվ 2022-ին ընդդիմությունը կորցրեց առաջնորդի, որ կարող էր հաջողության հասցնել գործող իշխանության դեմ պայքարը: Հաշվի առնելով նրա գործունեությունը ՄԻՊ-ի պաշտոնում, ինչպես նաեւ՝ կրթվածության բարձր մակարդակը, կարող էր վերածվել վարչապետի լավագույն թեկնածուի: Ինչեւէ, դա տեղի չունեցավ, իսկ նախորդ տարի որոշեց, որ ժամանակն է կրկին զբաղվելու քաղաքականությամբ: Գրանցեց նախաձեռնություն, իսկ այս տարի՝ կուսակցություն ու դարձավ վարչապետի պաշտոնը զբաղեցնող անձի ամենակոշտ քննադատներից մեկը: Ու եթե հրաշք տեղի ունենար՝ Արման Թաթոյանն ու «Առաջարկ Հայաստանին» ծրագիրը միավորվեին, այն կարող էր նաեւ հաջողության հույս ունենալ ս. թ. հունիսի 7-ի ԱԺ ընտրության առումով: Բայց քանի որ կյանքում նման հրաշքներ չեն պատահում, Թաթոյանի «Միասնության թեւեր»-ին էլ ընդամենը կտեսնենք որպես ընդդիմադիր խորհրդարանական խմբակցություն, քանի որ հրաժարվել է հայտարարել, որ ամեն պարագայում կմիանա ընդդիմադիր առաջատար ուժին:

Վերադառնանք Ծառուկյանի «Բարգավաճ Հայաստան»-ին: Բարձր գնահատելով «Առաջարկ Հայաստանին» ծրագիրը՝ չեմ կարող չանդրադառնալ քարոզարշավի լուրջ թերությանը: Քարոզարշավն արդեն ընթանում է մեկ շաբաթ, սակայն Ծառուկյանի կողմնակիցները չգիտեն, թե ով է լինելու վարչապետի իրենց թեկնածուն, ինչն ընտրական գործընթացի առումով, մեղմ ասած, անհեթեթ իրավիճակ է ստեղծում, հատկապես՝ այնպիսի երկրում, ինչպիսին Հայաստանն է, որտեղ նախընտրական մրցակցությունը տեղի է ունենում ոչ թե ծրագրային դրույթների, այլ՝ քաղաքական այս կամ այն ուժի առաջնորդների կերպարների միջեւ: Չնայած հասկանալի է, թե ինչու է գաղտնի պահվում ԲՀԿ-ական թեկնածուն: Նախկինների օրոք նախարարներ նշանակող եւ հանող Ծառուկյանն այդպես էլ չկարողացավ բարձրանալ պետության ղեկավարի մակարդակին: Նույնիսկ ազգակործան պատուհաս անվանված Նիկոլի պարագայում ինքը չի դիտարկվում որպես պոտենցիալ ղեկավար, չնայած այն բանին, որ նույն Ծառուկյանը ժամանակին լավ էլ կառավարել է Հայաստանի օլիմպիական կոմիտեն` գրագետ օգնականների ու համախոհների աջակցությամբ:

Ի դեպ, 20-րդ դարասկզբին ԱՄՆ-ում դատ է ընթացել ավտոարդյունաբերության հիմնադիրներից Հենրի Ֆորդի եւ նրան իր հոդվածներից մեկում, կարծեմ, տեխնիկապես անգրագետ անվանած լրագրողի միջեւ: Դատը շահել է Ֆորդը՝ ցույց տալով, որ ինքն օգտագործել է իր օգնականների գրագիտությունն ու կարողությունները: Եվ դա չի խանգարել, որպեսզի իր արտադրած «Ֆորդ» մակնիշի մեքենաները շուկայում առաջատար լինեին բազում տարիներ:

© 2026 Secure News Portal

Source: Hraparak

Մասին Hraparak.am

Hraparak.am

Կարդացեք նաև

Զելենսկի․ Թրամփն ու Սին կարող են Պուտինին կանգնեցնել մեկ հանդիպմամբ

Զելենսկի․ Թրամփն ու Սին կարող են Պուտինին կանգնեցնել մեկ հանդիպմամբ Thu, 19 Nov 2026 19:39:59 …