Ինչ է առաջարկում Մակրոնը՝ Հորմուզի վերաբերյալ

Fri, 15 May 2026 23:55:30 +0400

Ֆրանսիան մտադիր է առաջարկել ՄԱԿ-ին՝ հանդես գալ Հորմուզի նեղուցում ազատ նավագնացության ապահովման համար անհրաժեշտ պայմանների հետ կապված բանակցություններ վարելու նախաձեռնությամբ՝ հայտարարել է նախագահ Էմանուել Մակրոնը։ Ի՞նչ է դա նշանակում։ Եթե հետեւենք Մակրոնի հայտարարությանը, ապա Ֆրանսիան փորձելու է հասնել նրան, որ Հորմուզի նեղուցի բլոկադան անվերապահ եւ անխոչընդոտ կերպով վերացվի, ինչպես նաեւ՝ Իրանի հետ մեկնարկի սպասված երկխոսության անցկացումը։ Մակրոնի նախագծի համաձայն՝ դա լինելու է բացարձակապես չեզոք եւ խաղաղ բանակցային հարթակ, որի նպատակն է լինելու՝ կարգավորել իրանական ճգնաժամը։

Այդ ամենի համար Մակրոնը նախատեսում է նաեւ հատուկ առաքելության հաստատում եւ հավաստիացնում, որ Փարիզը Լոնդոնի հետ միասին կարողացել է ներգրավել 50 երկիր։ Ֆրանսիայի նախագահը միջազգային համայնքի համար բացարձակ առաջնահերթություն է համարել Հորմուզի նեղուցի վերաբացումը եւ ընդգծել է՝ Ֆրանսիան կողմ է, որ նախ բացվի նեղուցը, մինչ մյուս հակասությունները կկարգավորվեն։ Նեղուցի վերաբացումից հետո արդեն կարելի է սկսել բանակցությունները միջուկային կամ հրթիռային ծրագրերի շուրջ՝ ԱՄՆ-ի եւ Իսլամական Հանրապետության միջեւ՝ եվրոպական եռյակի՝ Գերմանիայի, Ֆրանսիայի եւ Միացյալ Թագավորության մասնակցությամբ։ Հասկանալի է, որ ինչ-որ ձեւով, եթե ամեն բան լավ ընթանա, ապա կարող է կնքվել միջուկային գործարքի նոր համաձայնագիր։ Սակայն այստեղ հարց է, թե ինչ են անելու Ռուսաստանն ու Չինաստանը, եւ արդյո՞ք Մակրոնի ասած 50 երկրների մեջ Չինաստանն ու հատկապես՝ Ռուսաստանը մտնում են, եթե հաշվի առնենք Ռուսաստան-Եվրոպա հարաբերությունների ներկայիս լարված վիճակը։