Արտակարգ դեպք Մասիսում․ հարբած բուժառուն սպառնացել է օգնության եկած շտապօգնության անձնակազմին

Thu, 21 May 2026 13:05:00 +0400

«Հրապարակ»-ի տեղեկություններով երեկ Հայանիստ գյուղում 49-ամյա հարբած տղամարդու համար շտապ օգնություն են կանչել։ Շտապ օգնության խմբի ժամանումից հետո տղամարդը սկսել է հայհոյել, վիրավորանքներ ու սպառնալիքներ հնչեցնել։

ՆԳՆ-ից մեր հարցին ի պատասխան հայտնեցին․ «Մայիսի 19-ին՝ ժամը 20․30-ի սահմաններում, Համայնքային ոստիկանության Մասիսի բաժին հաղորդում է ստացվել, որ կանչով Հայանիստ գյուղ մեկնած շտապօգնության անձնակազմին բուժառուն սպառնում է՝ խոչընդոտելով նրանց մասնագիտական գործողություններին։

Հայանիստ մեկնած համայնքային ոստիկանները պարզել են, որ ոչ սթափ 49-ամյա տղամարդը շտապօգնության աշխատողներից պահանջել է կատարել այնպիսի գործողություններ, որոնք անհամատեղելի են նրանց գործառույթների հետ, հնչեցրել է սպառնալիքներ՝ շտապօգնության աշխատողների մոտ առաջացնելով վախի և տագնապի զգացողություն։ 49-ամյա տղամարդը ձերբակալվել և տեղափոխվել է Մասիսի բաժին, ապա կազմված փաստաթղթերի հետ ներկայացվել է նախաքննական մարմին»։