ՌԴ-ն զգուշացնում է՝ Հայաստանի գյուղմթերքը չի համապատասխանում իրենց պահանջներին

Fri, 29 May 2026 10:00:04 +0400

Հայկական գյուղմթերքը վերջին շրջանում չի համապատասխանում Ռուսաստանի պահանջներին։ ՌԻԱ Նովոստիին այս մասին հայտնել են Ռոսսելխոզնադզորից։

«Հաշվի առնելով, որ Ռուսաստանը հայկական գյուղմթերքի իրացման հիմնական շուկան է, և այն, որ վերջին շրջանում Հայաստանից մատակարարվող արտադրանքը չի համապատասխանում ԵԱՏՄ-ի և Ռուսաստանի բուսասանիտարական պահանջներին, կարելի է ենթադրել, որ ՀՀ էկոնոմիկայի նախարարությունը չի կարողանում իրականացնել գյուղատնտեսության նախարարության լուծարումից հետո իրեն վերապահված լիազորությունները», – ասվում է հաղորդագրության մեջ:

Գերատեսչությունից նշել են, որ Հայաստանում 2019 թվականին կառավարության կառուցվածքային փոփոխությունների արդյունքում լուծարվել է գյուղատնտեսության նախարարությունը, իսկ գյուղատնտեսության ոլորտում պետական քաղաքականությունը վերապահվել է էկոնոմիկայի նախարարությանը։

Հիշեցնենք` ավելի վաղ Ռոսսելխոզնադզորը հայտնել էր, որ մայիսի 30-ից սահմանափակում է Հայաստանից պտուղ-բանջարեղենի ներկրումը: Մայիսի 22-ից գերատեսչությունը ժամանակավորապես սահմանափակել է Հայաստանից ծաղիկների ներկրումը։

Մայիսի 15-ին հայտնի դարձավ, որ Ռոսսելխոզնադզորը մտադիր է ստուգումներ անցկացնել հայկական մի շարք ձեռնարկություններում, այդ թվում` այն ընկերություններում, որոնց արտադրանքի մատակարարումը Ռուսաստան ավելի վաղ դադարեցվել էր: Պատճառը կեղծված ձկնամթերքի ներկրման կասկածներն են, որոնք ենթադրաբար եվրոպական ծագում ունեն։