ԵԱՏՄ–ում չեն ցանկանում, որ Հայաստանը դուրս գա միությունից. Լուկաշենկո

Fri, 29 May 2026 20:30:35 +0400

ԵԱՏՄ անդամ պետությունները չեն ցանկանում, որ Հայաստանը դուրս գա Եվրասիական միությունից։ Ինչպես հայտնում է «Բելտա» ընկերությունը, այս մասին հայտարարել է Բելառուսի նախագահ Ալեքսանդր Լուկաշենկոն։
ԵԱՏՄ չորս երկրների՝ Ռուսաստանի, Բելառուսի, Ղրղզստանի և Ղազախստանի ղեկավարներն այսօր Հայաստանի վերաբերյալ համատեղ հայտարարություն են ընդունել։

«Մենք բոլորս փաստել ենք, որ չենք ցանկանում` Հայաստանը դուրս գա մեր Եվրասիական միությունից։ Վլադիմիր Վլադիմիրովիչը (Ռուսաստանի նախագահ Պուտինը. խմբ) ելույթի ժամանակ հայտարարել է` մենք հարգում ենք Հայաստանի ընտրությունը», – ասել է Լուկաշենկոն։

Բելառուսի նախագահն ընդգծել է` ԵԱՏՄ անդամ պետությունների ղեկավարները հարգում են հայ ժողովրդի ընտրությունը։

«Եթե ժողովուրդը նման որոշում կայացնի և համաձայնություն տա ԵԱՏՄ–ից դուրս գալուն և մի օր Եվրոպական միությանը միանալուն, մենք չենք կարող դեմ գնալ հայ ժողովրդի կամքին»,– նշել է Բելառուսի առաջնորդը։
Նա հավելել է` ՌԴ նախագահը խոստացել է այդ մասին մանրամասն զեկուցել ամբողջ միջազգային հանրությանը, ով կցանկանա դա լսել։

«Նա կրկին մանրամասն կպատմի. Ռուսաստանի մասնագետները նրա համար պատրաստել են այդ տեղեկությունը, թե ինչ է նշանակում հրաժարվել Եվրասիական միությունից, որում այսօր գտնվում է Հայաստանը, և միանալ Եվրոպական միությանը», – ասել է Լուկաշենկոն։

Բելառուսի նախագահը նաև նշել է, որ Հայաստանը պետք է հիշի ԵՄ-ին միանալու երկար ժամկետների մասին։
«Հաշվի առնելով Ուկրաինան, որը վաղուց է ցանկանում դա, է՛լ ավելի կարևոր է՝ հաշվի առնելով Թուրքիան, որը կարծես 25 կամ 30 տարի է սպասում Եվրոպական միությանը միանալու իր հերթին», – նշել է նա։