ԵՄ-ին Հայաստանի անդամակցությունը տեսանելի ապագայում քիչ հավանական է. եվրապատգամավոր
Tue, 02 Jun 2026 11:32:30 +0400
Մինչև 2030 թվականը Հայաստանի անդամակցությունը Եվրամիությանը քիչ հավանական է։
Այս մասին «Իզվեստիա»-ին ասել է Լյուքսեմբուրգից եվրապատգամավոր Ֆերնան Կարտհայզերը։
«Թեև Հայաստանը մեծ համակրանք է վայելում ԵՄ-ում, և պաշտոնական հարաբերությունները շարունակում են խորանալ, անդամակցության հարցը նախկինի պես ավելի շատ տեսական բնույթ է կրում։
Հաշվի առնելով Հայաստանի աշխարհագրական դիրքը և բարդ հարաբերությունները հարևաններից գոնե մեկի հետ, նման թեկնածությունը բազմաթիվ հարցեր է առաջացնում», – ասել է նա։
Եվրոպացի գործչի խոսքով՝ ներկայում ԵՄ-ն կենտրոնացած է Արևմտյան Բալկանների թեկնածու երկրների, ինչպես նաև Ուկրաինայի և Մոլդովայի անդամակցության հեռանկարների հետ կապված հարցերի վրա։
Նրա կարծիքով, այս փուլում ավելի իրատեսական է ԵՄ-ի և Հայաստանի միջև համագործակցության հետագա ընդլայնումը։ Խոսքը երկրի տնտեսական զարգացմանը աջակցելու, բնակչության կենսամակարդակը բարելավելու և մշակութային կապերն ամրապնդելու մասին է։
Կարտհայզերը հավելել է, որ Հայաստանը կարող է հետաքրքրություն ներկայացնել ԵՄ-ի համար և որպես արտաքին քաղաքականության գործընկեր, մասնավորապես՝ Իրանի հետ երկարատև հարաբերությունների շնորհիվ։