ԵԽ-ում կոչ են արել հրաժարվել Հայաստանի՝ ԵՄ անդամակցության գաղափարից

Sat, 27 Jun 2026 17:45:04 +0400

«Մայր Հայաստան» կուսակցության անդամ Դերենիկ Մալխասյանի ֆեյսբուքյան գրառումը․

««Կեղծ ակնկալիքներ». Եվրոխորհրդարանում կոչ են արել հրաժարվել Հայաստանի՝ ԵՄ անդամակցության գաղափարից․
Նիդեռլանդներից ընտրված Եվրոպական խորհրդարանի պատգամավոր Մայկե Անդրիեսեն կոչ է արել Եվրոմիությանը հրաժարվել Հայաստանին իր շարքերը հրավիրելու գաղափարից, քանի որ, նրա խոսքով, Հայաստանը աշխարհագրորեն կտրված է եվրոպական տարածքից։ Եվրոհանձնաժողովին ուղղված իր պատգամավորական հարցման մեջ նա պնդում է, որ Եվրոմիությունը պետք է մնա տնտեսական միություն, այլ ոչ թե աշխարհաքաղաքական նախագիծ, և ընդլայնման քաղաքականության մեջ առաջնորդվի մայրցամաքի հստակ սահմաններով։

Նրա կարծիքով՝ ավելի ճիշտ կլինի ընդհանրապես չխոստանալ Հայաստանի ինտեգրումը Եվրոմիությանը, որպեսզի Երևանում կեղծ ակնկալիքներ չձևավորվեն, իսկ հանրապետության հետ համագործակցել այնպես, ինչպես Եվրոմիությունը համագործակցում է միավորման կազմից դուրս գտնվող ցանկացած այլ պետության հետ։ Անդրիեսեն նաև զգուշացրել է Բրյուսելին քաղաքական իրավիճակով պայմանավորված հապճեպ որոշումներ կայացնելուց՝ որպես նման մոտեցման բացասական հետևանքների օրինակներ բերելով Ուկրաինայի և Մոլդովայի անդամակցության հայտերը։

Անդրիեսեն ներկայացնում է աջակողմյան «Ազատության կուսակցությունը» (PVV) և անդամակցում է Եվրոպական խորհրդարանի «Հայրենասերներ հանուն Եվրոպայի» (Patriots for Europe) խմբակցությանը, որը թվաքանակով երրորդն է Եվրոխորհրդարանում»։