«Հրապարակ»․ Քննչականի պետը ՊՊԾ պետին է պարգևատրել
Thu, 09 Jul 2026 08:15:42 +0400
Մենք պարբերաբար ներկայացնում ենք պետական պաշտոնյաների՝ տարբեր անձանցից ստացած նվերները, քանի որ օրենքը պարտադրում է թանկարժեք նվերները հայտարարագրել Կոռուպցիայի կանխարգելման հանձնաժողովում եւ որոշ նվերներ նաեւ հանձնել պետությանը, եթե դրանց արժեքը գերազանցում է թույլատրելի չափը։
Այս անգամ նվեր ստացողը ՊՊԾ պետ Արթուր Գասպարյանն է։ Հունիսի 23-ին Քննչական կոմիտեի նախագահ Արթուր Պողոսյանի կողմից նա պարգեւատրվել է։ Այս մասին տեղեկանում ենք Կոռուպցիայի կանխարգելման հանձնաժողովից։ Պողոսյանը Գասպարյանին նվիրել է AWI 2496 ապրանքանիշի ոսկյա ծածկույթով եւ բնական կաշվե գոտիով ճապոնական ժամացույց։ Ժամացույցն արժե 92 հազար դրամ։ Այն նվիրել է Քննչական կոմիտեի գործունեությանն օժանդակելու եւ ՊՊԾ կազմավորման տոնի կապակցությամբ։