Թեհրանը գիտի՝ ինչ անել, եթե ԱՄՆ-ն «ուրանա» հուշագիրը

Sat, 11 Jul 2026 11:00:48 +0400

Իրանը պատրաստ է տոտալ պաշտպանության, եթե ԱՄՆ-ն «ուրանա» ռազմական գործողությունների դադարեցման մասին հուշագիրը։

Այս մասին հայտարարել է Իրանի խորհրդարանի խոսնակ Մոհամմադ Բաղեր Ղալիբաֆը, ով նաև ԱՄՆ-ի հետ երկխոսության իրանական պատվիրակության ղեկավարն է:

«Մենք երբեք չենք դադարեցրել նախապատրաստվել սեփական երկրի պաշտպանությանը, և ցանկացած պահի մենք պատրաստ կլինենք տոտալ պաշտպանության, եթե ամերիկացիները դավաճանեն հուշագրին», – ասել է Ղալիբաֆը ինդոնեզացի գործընկերոջ հետ հանդիպման ժամանակ:

Հիշեցնենք՝ նախօրեին ԱՄՆ նախագահ Դոնալդ Թրամփը հայտարարել է, թե Իրանն, իբր, դիմել է Միացյալ Նահանգներին՝ խաղաղ բանակցությունները շարունակելու խնդրանքով, ինչին Վաշինգտոնը դրական է պատասխանել։

Այդուհանդերձ, ըստ Թրամփի, ամերիկյան կողմը Թեհրանին հայտնել է, որ Իրանի հետ հրադադարի ռեժիմն այլևս չի գործում։

Իրանն առայժմ հերքում է սպասվող բանակցությունների վերաբերյալ լուրը, որն, ըստ Axios-ի, ենթադրաբար տեղի կունենա գալիք շաբաթ՝ հավանաբար ՝ Շվեյցարիայում։