«Հրապարակ». ՔՊ-ականները եւս մեկ անգամ ցույց տվեցին իրենց անմարդկային նկարագիրը

Wed, 05 Aug 2026 09:15:10 +0400

«Հրապարակի» զրուցակիցն ԱԺ նախկին պատգամավոր Գառնիկ Դանիելյանն է:

– Անկախությունից ի վեր առաջին անգամ Ազգային ժողովն իր աշխատանքները սկսեց առանց Վեհափառի օրհնության։ Ամենայն հայոց կաթողիկոս Գարեգին Բ-ին հրավեր չէր ուղարկվել, իսկ ՔՊ-ական ուսապարկերը հայտարարում են, որ իրենք Գարեգին Բ-ին չեն համարում վեհափառ, իսկ, օրինակ, Կնյազ Հասանովն ասում է, որ Վեհափառին որեւէ մեկը չի արգելել՝ գալ խորհրդարան, նա կարող էր գալ իր նախաձեռնությամբ: Ի՞նչ գնահատական կտաք այս ամենին:

– Խիստ անընդունելի է ինձ համար, ես, բնականաբար, բացասական եմ վերաբերվում այս երեւույթին: Սա հակաեկեղեցական արշավի շարունակությունն է: Պարզ է, որ այս իշխանությունը չի հանդարտվելու, չի հանգստանալու, եւ այս քայլով հերթական անգամ փաստեցին, որ ամեն բան անելու են՝ Հայ առաքելական եկեղեցուն վնաս հասցնելու համար: Եկեղեցու բնականոն գործունեությունն ամեն գնով փորձելու են խաթարել: Վեհափառը պետք է մասնակցեր ԱԺ անդրանիկ նիստին եւ պետք է տար իր օրհնությունը, սակայն, փաստորեն, կատարվեց հերթական ապօրինի եւ անբարո քայլը: Թեպետ իշխանությունը վաղուց է կարմիր գծեր հատել, եւ այս ամենն ինձ համար նորություն չէր: Ամեն դեպքում, տեղի ունեցածը խայտառակություն է, սա առաջին հերթին վնասեց մեր երկրի միջազգային հեղինակությանը: Միջազգային մամուլը եւս անդրադարձել է այս խայտառակությանը, ուստի սա բացասական իմաստով ազդելու է մեր պետության հեղինակության վրա: Եկեղեցին այս փորձությանն էլ կդիմանա, պատվով կհաղթահարի այս փորձությունը նույնպես, սակայն ՔՊ-ականները եւս մեկ անգամ ցույց տվեցին իրենց անմարդկային նկարագիրը:

– Չնայած այս ամենին, իշխանական պատգամավորները ընդդիմադիրներին համերաշխության եւ բարեկրթության սահմաններում մնալու կոչերով հանդես եկան: Ի՞նչ եք կարծում` ի՞նչ համերաշխության մասին կարող է խոսք լինել այս պայմաններում:

– Համերաշխության մասին ինչպե՞ս կարելի է խոսել, եթե հենց անդրանիկ նիստին հենց իշխանական թիմն անցավ բարեկրթության սահմանները, իսկ ԱԺ նիստը մեկնարկեց առանց Վեհափառի օրհնության: Նման մթնոլորտում ի՞նչ համերաշխության մասին կարող է խոսվել: Իշխանավորների մոտեցումը հակասում է իրենց խոսքերին, մեղմ ասած: Իրենց ասածի լրիվ հակառակն են անում: Խոսում են համերաշխությունից, սակայն սադրում են, պառակտում են, բաժանարար գծերը խորացնում են, ատելության խոսք են տարածում: ԱԺ անդրանիկ նիստին դրեցին հենց այս ամենի հիմքը, եւ այդ ամենի ֆոնին խոսել համերաշխության մասին, մեղմ ասած, անլուրջ է:

– 9-րդ գումարման Ազգային ժողովի մասին կարծիքները տարբեր են: Կան տեսակետներ, որ այն նախորդ ԱԺ-ից ավելի թույլ է, անփորձ կադրերը շատ են այս անգամ, սակայն կան նաեւ տեսակետներ, որ այժմյան կազմն ավելի խայտաբղետ է, ավելի ուժեղ է:

– Ուժեղ եւ թույլ լինելը ցույց կտա ժամանակը, դեռ վաղ է ինչ-որ բան ասելը: Դեռ նոր է խորհրդարանը ձեւավորվել, սակայն ամենակարեւորն այն է, որ խորհրդարանն իսկապես ծառայի ժողովրդի շահերին: Պատգամավորները պարտավոր են այդ սկզբունքով առաջնորդվել: ԱԺ-ն անձնական հաշիվներ պարզելու վայր չէ, ոչ էլ իրար վիրավորելու վայր է: Մանավանդ՝ վերջին տարիներին մարդկանց սոցիալական վիճակն ավելի է վատացել, գյուղացիները, տնտեսվարողները վերջին սահմանափակումներից հետո կանգնել են լրջագույն խնդիրների առաջ, խնդիրները չափազանց շատ են, մի խոսքով` անվտանգային խնդիրներից մինչեւ սոցիալ-տնտեսականը` աշխատելու լիքը տեղ կա: Գիշեր-ցերեկ պետք է աշխատեն, որպեսզի այդ խնդիրները լուծեն: Սա պետք է լինի ԱԺ-ի առաքելությունը: Կգնան ճիշտ ճանապարհով` շատ ավելի լավ, չեն գնա՝ ուրեմն այն կլինի ի վնաս մեր ժողովրդի: Հատկապես ես հիմա խոսում եմ ընդդիմադիր սեգմենտի մասին, իշխանությունների պարագայում ամեն ինչ պարզ է: