Բաքվի վերաքննիչ դատարանը հայ գերիների հարցով որոշում է կայացրել

Thu, 06 Aug 2026 14:40:14 +0400

Բաքվի վերաքննիչ դատարանն անփոփոխ է թողել Արցախի նախկին ռազմաքաղաքական ղեկավարների վերաբերյալ դատավճիռները։ Տեղեկությունը հայտնում են ադրբեջանական լրատվամիջոցները։

Դատարանի որոշման մեջ նշվում է, որ Արայիկ Հարությունյանի, Բակո Սահակյանի, Դավիթ Բաբայանի, Լևոն Մնացականյանի, Արկադի Ղուկասյանի, Դավիթ Մանուկյանի, Դավիթ Իշխանյանի, Մադաթ Բաբայանի, Մելիքսեթ Փաշայանի, Գարիկ Մարտիրոսյանի, Էրիկ Ղազարյանի, Վասիլի Բեգլարյանի, Լևոն Բալայանի, Դավիթ Ալավերդյանի և Գուրգեն Ստեփանյանի վերաբերյալ քրեական գործով Բաքվի ռազմական դատարանի` 2026 թվականի փետրվարի 5-ի դատավճիռները պետք է թողնել անփոփոխ։

Հիշեցնենք` Արցախի նախկին ռազմաքաղաքական առաջնորդների գործով «դատավարությունը», որը Բաքվում սկսվել էր 2025 թվականի հունվարին, ավարտվեց այս տարվա փետրվարի 5–ին, և հրապարակվեցին դատավճիռները` ցմահ ազատազրկման դատապարտվեցին Արցախի Հանրապետության նախկին նախագահ Արայիկ Հարությունյանը, ԱԺ նախկին նախագահ Դավիթ Իշխանյանը, ՊԲ նախկին հրամանատար Լևոն Մնացականյանը և ՊԲ հրամանատարի նախկին տեղակալ Դավիթ Մանուկյանը։ Արցախի նախկին նախագահներ Արկադի Ղուկասյանն ու Բակո Սահակյանը դատապարտվեցին 20 տարվա ազատազրկման։