Թուրքիայում շատերը չեն հավանում Թրամփին․ նոր հարցում

Sun, 23 Aug 2026 20:15:27 +0400

Թուրքիայում հանրային կարծիքի ուսումնասիրությամբ զբաղվող «MetroPOLL» հետազոտական կենտրոնը հրապարակել է «Թուրքիայի զարկերակը. հուլիս 2026» սոցհարցման արդյունքները։ Ըստ այդմ՝ Թուրքիայի քաղաքացիների ճնշող մեծամասնությունը՝ 86%-ը, բացասական վերաբերմունք ունի ԱՄՆ նախագահ Դոնալդ Թրամփի նկատմամբ և նշել է, որ չի հավանում նրան։

Հարցման արդյունքների համաձայն՝ Թրամփին հավանողների թիվը կազմել է ընդամենը 7․6%։ Հարցվածների 4․4%-ը նշել է, որ անտարբեր է, իսկ 2%-ը հայտնել է, որ չի ճանաչում ԱՄՆ նախագահին։ 2026-ի ապրիլի համեմատ հուլիսին Թրամփի նկատմամբ դրական վերաբերմունքը փոքր-ինչ աճել է։ Ապրիլին նրան հավանում էր հարցվածների 6․1%-ը, իսկ չէր հավանում՝ 89․6%-ը։

Թրամփին ամենաշատը չեն հավանում ընդդիմադիր կուսակցությունների համակիրները։ Մասնավորապես, «İYİ» (Լավ) կուսակցության ընտրողների շրջանում չհավանողների ցուցանիշը կազմում է 97%։ Քրդամետ «Ժողովուրդների հավասարություն և ժողովրդավարություն» կուսակցության (DEM) ընտրողների շրջանում այդ ցուցանիշը 96.6% է, իսկ գլխավոր ընդդիմադիր ուժը համարվող «Ժողովրդահանրապետական» կուսակցության (ԺՀԿ-CHP) ընտրողների շրջանում՝ 89.3%։

Իշխող դաշինքի մաս կազմող «Ազգայնական շարժում կուսակցության» (ԱՇԿ-MHP) ընտրողները Թրամփին ամենաշատ հավանող խումբն են. նրանց 16.7%-ը դրական է արտահայտվել ԱՄՆ նախագահի մասին։ Իշխող «Արդարություն և զարգացում» կուսակցության (ԱԶԿ-AKP) համակիրների շրջանում այդ ցուցանիշը կազմում է 10.2%, նշում է Ermenihaber-ը։