Փաշինյանը Հեսսենի խաղաղության մրցանակ կստանա․ մանրամասներ

Wed, 16 Sep 2026 10:22:23 +0400

ՀՀ վարչապետ Նիկոլ Փաշինյանը սեպտեմբերի 18-ին մեկնելու է Գերմանիա՝ Հեսսենի խաղաղության մրցանակ ստանալու, տեղեկանում ենք Գերմանիայի Հեսսեն երկրամասի խորհրդարանի կայքէջից։

Ըստ հաղորդագրության, մրցանակը շնորհվում է «Հարավային Կովկասում խաղաղության հաստատմանն ուղղված ջանքերի, Հայաստանում ժողովրդավարական ինստիտուտների զարգացման և Եվրոպական միության հետ մերձեցման քաղաքականության համար»։

«Մրցանակը արժևորում է 51-ամյա քաղաքական գործչի շարունակական ջանքերը՝ երկրում ժողովրդավարական ինստիտուտների կայացման և Եվրոպական միության հետ մերձեցման ուղղությամբ։ Լինելով 2018 թվականի «Թավշյա հեղափոխության» առաջնորդներից մեկը՝ նա ճանապարհ հարթեց խորհրդարանական ընտրությունների անցկացման համար և այդ ժամանակից ի վեր, որպես վարչապետ, երկիրը խաղաղության հաստատմանն ուղղված ուղով առաջնորդում է դեպի Եվրոպա։ Միևնույն ժամանակ, ԱՄՆ-ի աջակցությամբ նրան հաջողվեց 2025 թվականի օգոստոսին հարևան պետության՝ Ադրբեջանի նախագահի հետ ընդունել խաղաղության մասին համատեղ հռչակագիր, ինչպես նաև նախաստորագրել «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը»,- ասված է հաղորդագրությունում:

Բացի այդ, մրցանակը նաև ունի դրամական բաղադրիչ՝ 25 հազար եվրո։

Հեսսենի խաղաղության մրցանակի հանձնման հանդիսավոր արարողությունը տեղի կունենա սեպտեմբերի 18-ին՝ Վիսբադենում։ Գերմանական կողմի պաշտոնական հաղորդագրության համաձայն՝ մրցանակը Փաշինյանին կհանձնի Հեսսենի խորհրդարանի նախագահ Աստրիդ Վալմանը։