Նույն դպրոցում միանգամից 27 երկվորյակ է սովորում

Thu, 24 Sep 2026 21:30:52 +0400

Թուրքիայի Իզմիր քաղաքի Makbule Süleyman Alkan դպրոցում միաժամանակ քսանյոթ երկվորյակային զույգ է սովորում։ Այս մասին հայտնում է «Haber7»-ը։ Հանրակրթական դպրոցը գործում է Բուջայի շրջանում 2003 թվականից։ Ունի 1600 աշակերտ։ Դպրոցի տնօրեն Հասան Բասրի Քարաօղլուն պարբերականի հետ զրույցում ասել է, որ դպրոցը արդեն հասցրել է շրջանում ստանալ «երկվորյակների դպրոց» անվանումը։

Ուշագրավ է, որ այս հանգամանքը աշխատում է դպրոցի օգտին։ Շատ ծնողներ ցանկանում են, որ իրենց երեխաները սովորեն հենց «երկվորյակների դպրոցում»։ Ուսուցիչներն էլ ասել են, որ սկզբում շփոթել են երկվորյակներին, սակայն հետո արդեն սովորել են զատորոշել, թե երկվորյակներից ով ով է։ Երկվորյակներն իրենք էլ տարբեր կերպ են արձագանքում։ Ոմանք ուրախ են որ իրենց երկվորյակ քրոջ կամ եղբոր հետ նույն դպրոցում նույն դասարանում են, ոմանք էլ ասում են, որ նեղվում են, երբ իրենց միշտ շփոթում են։