Իրանի բանակը կամավորներ է հավաքագրում

Sun, 04 Oct 2026 14:46:03 +0400

Իրանի բանակը նախատեսում է սկսել կամավորների ուսուցումը՝ «ազգային պաշտպանության» համար քաղաքացիների պատրաստման ծրագրի շրջանակում, հաղորդում է իրանական WANA լրատվական գործակալությունը։

Իրանի ցամաքային զորքերի պատրաստության և կրթության հարցերով հրամանատարի տեղակալ, բրիգադի գեներալ Մոհամմադ Ռեզա Ալիան-Նեջադը հայտարարել է, որ ծրագիրը կմեկնարկի Թեհրանում՝ երեք ուսումնական կենտրոններում։

Ըստ նրա, զինված ուժերի չորս տեսակների զինծառայողները կուղարկվեն հատուկ ընտրված մի քանի հարթակներ, որտեղ կամավորները նախ կանցնեն հիմնական զինվորական պատրաստություն, ապա կկարողանան շարունակել ուսուցումը ավելի առաջադեմ ծրագրերով։

Իրանի իշխանությունները չեն հստակեցրել, թե որքան քաղաքացի է նախատեսվում ներգրավել ծրագրում, և արդյոք այն կտարածվի երկրի մյուս շրջանների վրա։