Հայ օդաչու է զոհվել ռազմական ինքնաթիռի կործանման հետևանքով

Sat, 24 Oct 2026 20:45:01 +0400

Ֆրանսիայում ռազմական ինքնաթիռի կործանման հետևանքով զոհվել է հայազգի 44-ամյա փոխգնդապետ Անդրանիկ Սարգսյանը։ Այս մասին հայտնում է Ֆրանսիայի պաշտպանության նախարարությունը։

Դեպքը տեղի է ունեցել հոկտեմբերի 20-ին Ֆրանսիայի Նանսի քաղաքի մերձակայքում գիշերային ուսումնական թռիչքի ընթացքում։ Գերատեսչության հաղորդմամբ՝ ավիավթարի հետևանքով զոհվել է նաև 27-ամյա լեյտենանտ Քվենտին Կլիսը։ Վթարի պատճառն առայժմ հայտնի չէ, հետաքննություն է իրականացվում ռազմաօդային ուժերի Mirage 2000D ռազմական ինքնաթիռի կործանման հանգամանքները պարզելու համար։

Լիոնի հայ համայնքից հայտնում են, որ Անդրանիկ Սարգսյանը Ֆրանսիայի ռազմաօդային ուժերի փորձառու և բարձր որակավորում ունեցող սպա էր։ Ուներ շուրջ 2200 թռիչքային ժամ, մասնակցել էր 55 մարտական առաքելության, միջազգային ռազմական գործողությունների Աֆղանստանում, Մալիում, Նիգերում, Սուդանում և Չադում։ 2022թ․-ից զբաղեցնում էր Սյուիպի ռազմական ավիացիոն հրաձգարանի ղեկավարի պաշտոնը։