Իմ գլխին քանի՞ մազ կմնար` եթե կալանավայրերում այսպիսի մահվան շքերթ լիներ

Tue, 10 Nov 2026 20:45:54 +0400

Կալանավայրում մահացել է «Ուժեղ Հայաստան» կուսակցության՝ ՏԻՄ ընտրություններում Ստեփանավան խոշորացված համայնքի ղեկավարի թեկնածու Արսեն Գևորգյանը։ Արսեն Գևորգյանը Նիկոլ Փաշինյանի իշխանության օրոք սանձազերծած քաղաքական հետապնդումների, ակնհայտ ոչ իրավաչափ խափանման միջոցի և նպատակային վարկաբեկման արշավի հերթական զոհն է։

Քաղաքական գործիչ Նաիրա Զոհրաբյանը՝ «Հրապարակի» հետ զրույցում, անդրադառնալով կատարվածին ասում է.

«Հերթական ողբերգությունն է տեղի ունեցել: Ես փորձեցի որպես եվրոպական ինտեգրման հանձնաժողովի նախկին նախագահ պատկերացնել, թե իմ գլխին քանի՞ մազ կմնար, եթե քրեակատարողականներում այսպիսի մահվան շքերթ տեղի ունենար: Հիշենք, թե ինչպես տարիներ առաջ` ուղիղ եթերում հանկարծամահ եղավ պրոդյուսեր Արմեն Գրիգորյանը դատական նիստի ժամանակ: Հիշենք Վոլոդյա Գրիգորյանին, որը պարզապես գնդակահարվեց իր տան բակում` Փարաքարի ընտրություններից մի քանի ամիս անց: Հիշենք այն քաղաքացուն, ով Նիկոլի պաստառը պոկելու համար ձերբակալվեց, ապա ինքնասպան եղավ, իսկ իշխանությունները շտապեցին հայտնել, որ նա գիժ էր, խելագար, և այլն: Ես քիչ առաջ լսում էի Արդարադատության նախարարի հայտարարությունը: Գիտեք ինչ, երբ կինն է այս աստիճան ապրումակցման զգացումից զուրկ, դա մի տեսակ առավել աբսուրդային է թվում: Այնպիսի հանգստությամբ էր խոսում կատարվածի մասին, որ պարզապես ապշում ես: Եթե այս ամենը տեղի ունենար այլ երկրում, ապա Արդարադատության նախարարն ու ՔԿԾ պետը վայրկյանների ընթացքում հրաժարական ներկայացրած կլինեին: Սա խայտառակություն է պարզապես, ես բառեր չեմ գտնում ասելու»:

«Ապրելու երկիր» կուսակցության համահիմնադիր Մեսրոպ Առաքելյանն էլ անդրադառնալով թեմային, նկատեց. «Նախ ցավակցում եմ Արսեն Գևորգյանի հարազատներին, ընկերներին, տեղի է ունեցել ողբերգական դեպք: Պետք է արձանագրենք, որ հերթական անգամ քաղաքական հաշվեհարդար է տեսնում իշխանությունը, որը ունեցավ ողբերգական ավարտ: Արսենն էլ, շատ այլ ընդդիմադիր գործիչների նման, կալանավորված էր, այլ ոչ թե դատապարտված: Կալանքը ընդդիմությանը լռեցնելու միջոց է դարձել: Նիկոլ Փաշինյանն իր առաջ խնդիր է դրել ամեն գնով ընդդիմությանը բանտարկել, եթե անգամ չկա որևէ դատավճիռ: Արսենը կալանավորվել էր ենթադրությունների հիման վրա, այն դեպքում, երբ այդ քրեական գործի շրջանակներում անթույլատրելի էր կալանավորել մարդուն, եթե անգամ տեսականորեն լիներ քրեական հանցանքի տարր: Նիկոլ Փաշինյանի և իր թիմի գլխավոր նպատակը ընդդիմությանը ուղղակի կալանավորելն է: Սա ակնհայտ քաղաքական հետապնդում է, և մենք տեսնում ենք, որ այս գործելաոճը հանգեցնում է նաև ողբերգական ավարտի: Առաջին դեպքը չէ: Հատկապես ՏԻՄ համակարգում ընդդիմադիր թեկնածուների հետ այսպես են վարվում: Ընտրություններից ընդամենը մի քանի օր առաջ ընդդիմադիր թեկնածուի մահը ազդեցություն է թողնելու: Իշխանությունները խելքի չեն գալու, նրանք պետք է հեռանան: Հայաստանում պետք է ժողովրդավարություն հաստատվի, ինչի մասին հեքիաթներ են պատմում Փաշինյանն ու իր թիմակիցները»: