Քուշները՝ Պուտինին․ ԱՄՆ-ն սկսել է եվրոպացիների հետ քննարկել մայրցամաքի անվտանգության նոր համակարգը

Thu, 12 Nov 2026 21:19:40 +0400

ԱՄՆ նախագահ Դոնալդ Թրամփի հատուկ բանագնաց Ջարեդ Քուշները հայտարարել է, որ Վաշինգտոնը սկսել է եվրոպական երկրների հետ քննարկել մայրցամաքի անվտանգության ապագա համակարգը։ Այս մասին նա հայտնել է Մոսկվայում՝ Ռուսաստանի նախագահ Վլադիմիր Պուտինի հետ հանդիպման ընթացքում։

Քուշների խոսքով՝ եվրոպական երկրները ցանկություն են հայտնել մասնակցելու Ուկրաինայի շուրջ բանակցություններին և նպաստելու հակամարտության ավարտին։ Ամերիկացի բանագնացը նշել է, որ եվրոպական գործընկերների ներգրավումը կարող է կարևոր լինել բանակցային գործընթացի առաջխաղացման համար։

Քուշներն ու ԱՄՆ հատուկ բանագնաց Սթիվ Ուիթքոֆը Մոսկվա են ժամանել Աբու Դաբիում Ռուսաստանի, Ուկրաինայի և ԱՄՆ-ի միջև երկօրյա բանակցություններից հետո։ Հանդիպումների ընթացքում կողմերը սկզբունքային համաձայնություն են ձեռք բերել ռազմագերիների փոխանակման շուրջ, սակայն տարածքային հարցերում և անվտանգության երաշխիքների շուրջ տարաձայնությունները պահպանվել են։

ԱՄՆ ներկայացուցիչները փորձում են ստանալ Մոսկվայի համաձայնությունը՝ եվրոպական երկրների ներկայացուցիչներին բանակցային գործընթացում ներգրավելու համար։ Քուշները հույս է հայտնել, որ Պուտինը դրական կվերաբերվի այդ առաջարկին։

Միևնույն ժամանակ, Կրեմլը դեռևս վերապահումներ ունի եվրոպացիների անմիջական մասնակցության հարցում։ Ռուսաստանի ներկայացուցիչները պնդում են, որ Եվրոպայի անվտանգության նոր համակարգի քննարկումը պետք է դառնա Ուկրաինայի հակամարտության կարգավորման ավելի լայն գործընթացի մաս։