Հայաստանը պատրաստվում է սկսել ԵՄ-ին անդամակցության գործընթացը

Mon, 24 Aug 2026 12:16:21 +0400

Վարչապետ Նիկոլ Փաշինյանը Ազգային ժողովում կառավարության հնգամյա ծրագիրը ներկայացնելիս հայտարարել է, որ Հայաստանը առաջիկայում կարող է սկսել Եվրամիությանն անդամակցելու պաշտոնական դիմում ներկայացնելու գործընթացը։

Փաշինյանի խոսքով՝ նախ անհրաժեշտ է ԵՄ-ին ներկայացնել պաշտոնական հայտ, որից հետո ստանալ համապատասխան արձագանք և ունենալ գործընթացի հետագա քայլերը սահմանող ճանապարհային քարտեզ։ Միայն դրանից հետո, ըստ վարչապետի, Հայաստանում կանցկացվի հանրաքվե՝ Եվրամիությանն անդամակցելու հարցով։

Փաշինյանը նշել է, որ այս գործընթացում հաշվի է առնվում նաև Հայաստանի ներկայիս տնտեսական իրավիճակը։ Նրա խոսքով՝ ԵՄ շուկա հասանելիություն ապահովելու ուղղությամբ արդեն առաջին քայլերն են կատարվում, և քաղաքացիներին անհրաժեշտ է ժամանակ՝ այդ հնարավորությունների տնտեսական ազդեցությունը գնահատելու և հասկանալու համար։

Վարչապետը նաև ընդգծել է, որ եվրոպական ինտեգրման օրակարգը կապված է Հայաստանի վարած հավասարակշռված արտաքին քաղաքականության հետ։ Նրա գնահատմամբ՝ Հայաստանի համար վտանգավոր է այնպիսի իրավիճակը, երբ երկիրը չունի այլընտրանքային ուղղություններ և զրկված է ընտրության հնարավորությունից։

Փաշինյանի խոսքով՝ հենց այդ պատճառով էլ իշխանությունը կարևորում է տարբեր ուղղություններով հարաբերությունների զարգացումը և արտաքին քաղաքականության մեջ այլընտրանքների ձևավորումը։