20 հայ գերիները Նիցցայի պատվավոր քաղաքացու կոչում կստանան. Էրիկ Սիոտի

Fri, 23 Oct 2026 16:53:37 +0400

Նիցցայի քաղաքապետարանի ճակատային հատվածում հայ համայնքը մոտ մեկ տարի առաջ տեղադրել է Բաքվի բանտերում գերի պահվող Արցախի ռազմաքաղաքական վերնախավի լուսանկարները, իսկ այս տարվա հոկտեմբերի 22-ին մեծ միջոցառում է կազմակերպել, որին մասնակցել է նաեւ քաղաքապետ Էրիկ Սիոտին: Կայացել է դասախոսություն՝ Ժան -Քրիստոֆ Բյուսոնի Լիովին դեպի Արեւելք գրքի առիթով, լեփ-լեցուն դահլիճում է եղել Նիցցահայ համայնքը։ Նիցցայի քաղաքապետը վերահաստատել է իր աջակցությունը հայ բանտարկյալներին, որոնք գտնվում են Բաքվի բանտերում, պահանջել է նրանց անհապաղ ազատ արձակումը եւ ասել է, որ պատրաստվում է նրանց Նիցցայի պատվավոր քաղաքացու կոչում շնորհել

«Խայտառակ դատավարությունների հետևանքով 20 հայ շարունակում է մնալ Բաքվի բանտերում: Ադրբեջանական ռեժիմը փորձում է նրանց ջնջել մեր հիշողությունից։ Նիցցան ժամանակին գրկաբաց ընդունել է 1915 թվականի ցեղասպանության վերապրածներին, իսկ այսօր կրկին մենք կանգնում ենք հայերի կողքին: Նիցցա քաղաքը ճանաչում է գերիների դեմքերը, գիտի անունները և թույլ չի տա, որ նրանք մոռացության մատնվեն: Այսօր, Նիցցայի հայ համայնքի կողքին սատար կանգնած, մենք պահանջում ենք գերիների անհապաղ և անվերապահ ազատ արձակումը։ Պատրաստվում եմ Արցախի 20 հայ բանտարկյալներին Նիսի պատվավոր քաղաքացու կոչում շնորհելու նախաձեռնությամբ հանդես գալ։ Սա կարևոր խորհրդանշական քայլ է՝ ի նշան Բաքվում անարդարացիորեն ազատությունից զրկվածների հանդեպ մեր ունեցած համերաշխության։ Նիցցա քաղաքը կշարունակի իր ուշադրության կենտրոնում պահել այս հարցը՝ մինչև նրանք ազատ արձակվեն»,- հայտարարել է Նիցցայի քաղաքապետ Էրիկ Սիոտին։