Իսրայելի ընդդիմությունը լուրջ կասկածներ ունի Նեթանյահուի վերաբերյալ

Thu, 29 Oct 2026 20:30:20 +0400

Իսրայելում ընդդիմադիր դաշինքի և «Յաշար» կուսակցության առաջնորդ, Իսրայելի բանակի նախկին շտաբի պետ Գադի Այզենկոտը կարծում է, որ վարչապետ Բենիամին Նեթանյահուն օգտագործում է խորհրդարանական ընտրություններին հնարավոր արտաքին միջամտության վերաբերյալ հետաքննությունը՝ դրանց արդյունքների հրապարակումը հետաձգելու համար, ըստ «The Times of Israel»-ի։

Այզենկոտն ասել է, որ անընդունելի է համարում Նեթանյահուի փորձը՝ օգտագործել նոր, դեռևս չավարտված հետաքննությունը՝ ընտրությունների պաշտոնական արդյունքների հրապարակումը խոչընդոտելու համար. «Իսրայելը պետք է ապահովի ընտրությունների ամբողջականությունը և կանխի միջամտության, շահարկումների և մանիպուլյացիաների ցանկացած փորձ։ Մյուս կողմից, քաղաքական ուժերը չպետք է օգտագործեն իրավիճակը՝ ազդելու 26-րդ գումարման Քնեսեթի երդմնակալության ժամանակացույցի վրա»։

Միևնույն ժամանակ, «The Jerusalem Post»-ը, հղում անելով աղբյուրներին, հաղորդում է, որ հետաքննությունը չի ազդի արդյունքների հրապարակման ժամանակացույցի վրա։ Հայտնի չէ, թե արդյոք հետաքննությունից հետո կանցկացվեն վերընտրություններ։ «Մենք նախ պետք է ստուգենք, թե արդյոք միջամտություն է եղել, և արդյոք դա արտացոլվել է Քնեսեթում տեղերի բաշխման մեջ», – հրատարակությանը ասել է աղբյուրը՝ հավելելով, որ հետաքննությունը չի խանգարի Իսրայելի նախագահ Իցհակ Հերցոգին սկսել կառավարական կոալիցիա ձևավորելու և դրա առաջնորդին ընտրելու գործընթացը։

Քվեարկությունների մոտավորապես 91%-ի հաշվարկից հետո Բենիամին Նեթանյահուի գլխավորած իշխող կոալիցիան խորհրդարանում ունի 53 տեղ, մինչդեռ ընդդիմադիր կոալիցիան՝ 48: Արաբական «Ռաամ» և «Միացյալ ցուցակ» կուսակցությունները կարող են ապահովել 19 տեղ: 120 տեղանոց խորհրդարանում մեծամասնություն ապահովելու համար անհրաժեշտ է առնվազն 61 տեղ։