Աջապահյանի օրհնությամբ ներկայացվել է Մխիթար Գոշի «արդար դատավորի» պատկերացումը
Mon, 16 Mar 2026 12:45:47 +0400
Մեծ Պահքի հինգերորդ՝ Դատավորի կիրակիին նվիրված «Մխիթար վարդապետ Գոշը՝ արդար դատավորի որոնումներում» թեմայով բանախոսություն է անցկացվել Շիրակի թեմում։
Շիրակի թեմի առաջնորդ Գերաշնորհ Տեր Միքայել արքեպիսկոպոս Աջապահյանի և թեմի հոգևոր տեսուչ Գերաշնորհ Տեր Նարեկ եպիսկոպոս Ավագյանի օրհնությամբ, Շիրակի թեմի երիտասարդաց միության հրավերով թեմի սոցիալ-կրթական կենտրոնում բանախոսությամբ հանդես է եկել իրավաբանական գիտությունների թեկնածու, իրավապաշտպան Ռուբեն Մելիքյանը։
Բանախոսության ընթացքում թեմի երիտասարդներին և ներկաներին ներկայացվել են Մխիթար վարդապետ Գոշի կյանքի ու գործունեության հիմնական դրվագները, ինչպես նաև նրա «Դատաստանագիրք» աշխատության՝ դատավորներին վերաբերող հատվածները։Բանախոսության ընթացքում անդրադարձ է եղել նաև դատական իշխանության լեգիտիմության հարցին։ Ըստ Մխիթար Գոշի մեկնաբանության՝ դատական իշխանության հիմքը Նոր Կտակարանի ուսմունքն է, համաձայն որի Քրիստոս դատական իշխանությունը փոխանցել է առաքյալներին, իսկ վերջիններս՝ եկեղեցական ավանդության համաձայն, այն փոխանցել են թեմակալ առաջնորդներին՝ եպիսկոպոսներին։
Նշվել է նաև, որ, ըստ Գոշի, դատավորը պետք է կարողանա վերահսկել իր զգացմունքները՝ ներս թողնելով միայն «բարի» ազդակները։
Բանախոսության ընթացքում առանձնացվել են արդարադատությունը խեղաթյուրող երեք հիմնական պատճառներ, որոնք, ըստ Գոշի, շարունակում են արդիական մնալ նաև այսօր՝ կողմնապահություն, կոռուպցիա և ոչ պրոֆեսիոնալիզմ։