«Հրապարակ»․ Փաշինյանը երիտասարդության համար լուզեր է` մարդ, որն ամեն բան տապալել է

Wed, 15 Apr 2026 09:45:01 +0400

«Հրապարակի» զրուցակիցը քաղտեխնոլոգ Վիգեն Հակոբյանն է:

– ՔՊ-ական իշխանության նախընտրական լոգոտիպը կազմված է հայտնի սրտիկից, անամպ ու կապույտ երկնքից, որտեղ չկա ո՛չ Նիկոլ Փաշինյանի անունը, ո՛չ նրա լուսանկարը, ի տարբերություն նախորդ ընտրությունների լոգոտիպների: Շատերն այդ սրտիկը նմանեցնում են կնոջ կոնքերի, ծաղրում են ՔՊ-ականներին: Ըստ Ձեզ, ՔՊ-ի թրենդային սրտիկն ի՞նչ ազդեցություն կարող է ունենալ ընտրողի վրա: Մենք բավականին պահպանողական` «քյարթու» հասարակություն ենք, ասենք` հայ մարդը, հայ տղամարդն ի՞նչ է զգալու՝ այդ սրտիկը տեսնելով:

– Այն լրիվ արտացոլում է իրենց վարած քարոզչության գաղափարախոսությունը: Այդ թիմն անդադար սրտիկներ է ուղարկում, թիմի ղեկավարից մինչեւ կուսակցության անդամներ: Անգամ ուրախ ավտոբուսների մեջ` հերթով, մեկ հրահանգով սրտիկներ են անում: Ուզում են ցույց տալ, որ ինչպես հեղափոխական եղել են, այդպես էլ մնացել են, ուզում են ցույց տալ, որ սիրո եւ հանդուրժողականության հեղափոխությունը շարունակվում է` ոչինչ չի փոխվել, որ այսօրվա Նիկոլը հին Նիկոլն է: Ինչ վերաբերում է դրա ազդեցությանը, ապա հիմնականում նրանք աշխատում են իրենց երկաթբետոնյա ընտրազանգվածի վրա, որի համար, անկեղծ ասած, մեծ նշանակություն չունի՝ ՔՊ-ն սրտիկ կանի, քառակուսի ինչ-որ այլ նշաններ ցույց կտա, թե կլոր բաներ: Ոչ մի նշանակություն իրենց համար չունի այդ ամենը, քանի որ նրանք աղանդի հոգեբանությամբ են մոտենում այդ թիմին եւ նրա առաջնորդին, բայց երբ հարցնես, թե ինչու, նրանք չեն կարող այդ հարցին պատասխանել: Բացի այդ, ՔՊ-ն երիտասարդների հետ աշխատելու խնդիր ունի: Նոր սերունդը «քյարթու»-ից դուրս է, դաստիարակվել է այլ չափանիշներով, այլ ֆիլմեր է դիտել եւ ունի այլ պատկերացումներ: Նրանցից շատերն իդեալական են պատկերացնում Արեւմուտքն ու արեւմտյան արժեհամակարգերը: Փաշինյանն ուզում է ցույց տալ, որ ինքը լրիվ նույնն է, ոչինչ չի փոխվել, այն, որ իրենք հարստացել են, միլիոնատերեր են դարձել այս տարիներին, դրանք միֆեր են եւ այլն: Նրանք փորձում են անփորձ ընտրազանգվածի վրա ազդել, որը բաղկացած կլինի երիտասարդներից, մի խոսքով՝ երիտասարդներին խաբելը կարծում են, որ ավելի հեշտ է:

– Բայց եթե երիտասարդներն առաջադեմ են, չեն համակրում Փաշինյանին, ինչպե՞ս պետք է խաբվեն նրա սրտիկով լոգոտիպին:

– Ես կարծում եմ, որ ամենագլխավոր պրոբլեմը, որն ունի ՔՊ-ն, դա 18-35 տարեկանների ընտրազանգվածն է, որը չի ընտրում Փաշինյանին: Այդ պատճառով էլ փորձում են երիտասարդներին նման սիմվոլներով գրավել, սրտիկներ-մրտիկներ, վարչաբենդ եւ այլն: Փաշինյանը նաեւ հեծանիվ էր վարում, որը եւս այդ տրամաբանության մեջ է: Նրանց քաղտեխնոլոգները հուշել են, որ երիտասարդության հետ պետք է նույն ալիքի վրա լինել, որպեսզի երիտասարդությունը «ծիգրովկայով» տոտաների նման Փաշինյանին ընդունի որպես առաջնորդ: Փաշինյանը փորձում է, կստացվի, թե ոչ, դա այլ հարց է` ընտրությունները ցույց կտան, սակայն սոցհարցումները ցույց են տալիս, որ այս բոլոր հնարքներն ազդեցություն չեն ունենում երիտասարդների վրա: Մեր երիտասարդների զգալի մասը կայացած ու գրագետ է, նրանք կարողանում են շատ արագ տուն պահողներ դառնալ: Նրանք ինքնուրույն են եւ ինքնուրույն էլ որոշում են` ում ընտրել: 20, 30, 40 տարի առաջ տան մեծերն էին որոշում՝ ում եւ ինչպես ընտրել, բայց հիմա երիտասարդներն են տուն պահողները, եւ նրանք ինքնուրույն են կատարում իրենց ընտրությունը: Նիկոլ Փաշինյանը երիտասարդության համար լուզեր է, մարդ, որն ամեն բան տապալել է: Հաջողակ երիտասարդության մոտ նման կերպարները չեն կարող համակրելի լինել: