Հեղեղումներից տուժած մեքենաների համար կարող եք վնասի փոխհատուցում ստանալ

Wed, 15 Apr 2026 15:45:38 +0400

Ապրիլի 12-ին Երևանի Նոր Նորք վարչական շրջանի Գյուրջյան փողոցում ջրհեղեղ էր։ Ջուրը ողողել էր ողջ ճանապարհահատվածը՝ դժվարացնելով թե՛ հետիոտների, թե՛ վարորդների տեղաշարժը։ Պատճառը հորդառատ անձրևներն ու չմաքրված հեղեղատարներն էին։ «Հրապարակ»-ին ահազանգած քաղաքացիները նշում են, որ ջրհեղեղի հետևանքով մայթեզրին կայանված իրենց մեքենաները լուրջ վնասներ են կրել։ Ով պետք է հատուցի այդ վնասները, ով է կրում դրա մեղքն ու պատասխանատվությունը։

Մեզ հետ զրույցում փաստաբան Մհեր Հակոբյանը նշեց, որ վարորդները նախ պետք է փորձաքննությամբ ամրագրեն իրենց կրած վնասները, դրա չափը․ «Փորձաքննությունից հետո պետք է դիմեն Երևանի քաղաքապետարան, քաղաքապետարանը, եթե հատուցեց՝ լավ, բայց սովորաբար չի հատուցում, դրանից հետո դատական կարգով պետք է խնդրին լուծում տան, պիտի վարչական դատարան դիմեն։ Ցավոք այս դեպքում փորձագետի ծառայության դիմաց քաղաքացիներն են վճարում»։ Հակոբյանն ըմդգծեց, որ թեև նման գործերը դատարանը կարող է մինչև 2 տարի քննել, սակայն տուժողների հայցի բավարարման մասով շանսերը մեծ են։

Անդրադառնալով հարցին, թե կա՞ն արդյոք ժամկետներ՝ դիմելու համար, փաստաբանը նշեց․ «Եթե մի քանի օր առաջ տեղի ունեցած ջրհեղեղի համար այսօր դիմեն, կամ մեկ շաբաթից, որևէ պարագայում դա չի խախատի վաղեմության ժամկետը, քանի որ վաղեմության ժամկետը 3 տարի է։ Սակայն որքան շուտ ես դիմում, այնքան ճշգրիտ ձևով է ապրանքագետը կամ փորձագետը վնասի չափը ֆիքսում։ Հիմա, եթե դեպքից մի օր հետո է տարել փորձագետի մոտ, հասկանալի է, դատարանն այլ կերպ կընկալի, եթե դեպքից 2 ամիս հետո է տուժողը տարել փորձագետի մոտ, ու ասում է, որ էսինչ էլեկտրոնիկան փչացել է, ապա դատարանը կարող է ասել, որ դա պատճառահետևանքային կապի մեջ չի գտնվում ջրի հետ։ Նման դեպքերում, սովորաբար, խորհուրդ եմ տալիս անմիջապես հաջորդ օրը, առավելագույնը մյուս օրը իրականացնել վնասի չափի գնահատումը»։

Հարցին՝ տարբերություն կա՞ մեքենան կայանված է եղել մայթեզրին՝ մինչև ջրհեղեղը, թե այդ փողոցով անցնելու ժամանակ է վնասվել, փաստաբանը պատասխանեց․ «Գրեթե տարբերություն չկա, բայց կայանվածի դեպքում ավելի ամուր են հիմքերը, որովհետև եթե այդ փողոցով անցնելու պահին է մեքենան վնասվել կամ ջրի տակն անցել, ապա այս դեպքում կարող են ասել, որ անհաղթարելի ուժեր էին կամ ֆորսմաժորային վիճակ էր։ Իհարկե, դրան էլ կարելի է հակադարձել ու ասել, որ հեղեղատարներն էին փակ, բայց ամեն դեպքում կայանված մեքենայի պարագայում վիճակը ավելի անխոցելի է»։