Յուրաքանչյուր հայ պիտի այս օրը հարգի, հիշի, չմոռանա

Fri, 24 Apr 2026 13:56:27 +0400

Դերասան Սարգիս Գրիգորյանը Ծիծեռնակաբերդի հուշահամալիրում լրագրողների հետ զրույցում Հայոց ցեղասպանությունը բնութագրել է որպես հայ ժողովրդի ամենամեծ ողբերգություններից մեկը։

Նա ընդգծել է, որ յուրաքանչյուր հայ պարտավոր է հիշել այդ իրադարձությունները, հարգել զոհերի հիշատակը և պահպանել պահանջատիրության գաղափարը։ Նրա խոսքով՝ նման պատմական փորձառությունները չպետք է մոռացվեն, քանի որ դրանք ազգային հիշողության կարևոր մասն են։

Դերասանը նաև նշել է, որ այցելության ընթացքում երեխաներին փոխանցել է իր ընտանիքից ստացած պատմությունները՝ կարևորելով դրանց սերնդեսերունդ փոխանցումը։ Նրա համոզմամբ՝ հիշողության պահպանությունը անհրաժեշտ է, որպեսզի պատմությունը չկրկնվի և չմոռացվի։

Գրիգորյանը նաև կարծիք է հայտնել, որ ժամանակի ընթացքում կլինի արդարության պահ, երբ ոճրագործության համար պատասխանատուները կգիտակցեն իրենց արածը։

«Յուրաքանչյուր հայ պիտի այս օրը հարգի, հիշի, չմոռանա»,- ասել է նա: