Ընդդիմության հաղթանակը կասկածի ենթակա չի լինելու

Thu, 30 Apr 2026 20:15:17 +0400

Եթե խորհրդարանական ընտրությունները տեղի ունենան հաջորդ կիրակի, ընդդիմությունը ներկայացնող եռյակը կհավաքի 30,2 տոկոս ձայն: Խոսքը, բնականաբար, «Ուժեղ Հայաստան», «Հայաստան» դաշինքների ու «Բարգավաճ Հայաստան» կուսակցության մասին է: Նիկոլի ղեկավարած Քաղպայմանագիրը կհավաքի ընդամենը են 26,7 տոկոս: Այդ պարագայում վճռական է լինելու 4,2 տոկոսով «Միասնության թևեր»-ի դիրքորոշումը: Եթե Նիկոլին ընդդիմադիր Թաթոյանը մնա չեզոք՝ չաջակցելով գործող իշխանությանը կամ ընդդիմությանը, դա կբերի ընդդիմության հաղթանակին: Սակայն եթե Արևմուտքը ստիպի նրան բռնել Նիկոլի կողմը, ապա ընդդիմությունը կպարտվի: Դա, իհարկե, կլինի ճակատագրի դաժան հարվածը մեր պետությանը: 2015-ին սահմանադրություն վերաձևող Սերժ Սարգսյանը պետք է որ իմանար եվրոպական պառլամենտարիզմի այդ չարագուշակի երևույթի մասին:

Ինչևէ, որպեսզի միասնական ընդդիմության ճակատագիրը կախված չլինի իրենից դուրս ուժի տատանումներից, պետք է քայլեր կատարվեն հենց հիմա: Պետք է հանդիպում կազմակերպվի եռյակի անդամների միջև ու նրանք պայմանագիր ստորագրեն առաջիկա հինգ տարվա համագործակցության վերաբերյալ: Որպեսզի յուրաքանչյուրն իմանա, թե ինչ է տալիս ու ինչ է ձեռք բերում միասնության արդյունքում: Իհարկե, վատ չէր լինի, եթե դրան միանար Արման Թաթոյանը: Բայց վերջինս հստակ հայտարարել է, որ վերջնական որոշումը կկայացվի ընտրությունների ադյունքների ամփոփումից հետո: Դա նշանակում է, որ մինչև քվեարկության օրը ստորագրվելիք եռյակ պայմանագիրը պետք է բաց լինի քվեարկությունից հետո նոր անդամ կամ անդամներ ներառելու առումով: Բնականաբար, ներգրավման համապատասխան մեխանիզմներ մշակելով: Դա կհանգեցներ նաև անտարբեր կամ տատանվող զանգվածի ձայների մոբիլիզացմանը հօգուտ ընդդիմության: Ու այդ դեպքում ընդդիմության հաղթանակը կասկածի ենթակա չի լինելու:

Ընդդիմության հաղթանակը կասկածի ենթակա չի լինելու նույնիսկ այն դեպքում, եթե մինչև քվեարկությունը կալանավորվեն «Ուժեղ Հայաստան»-ի բոլոր ակտիվիստները: Որովհետև դա ավելի է բարձրացնելու «Ուժեղ Հայաստան»-ի հեղինակությունը: Ընդդիմության հաղթանակը կասկածի ենթակա չի լինելու՝ եթե Եվրամիությունը ոչ թե մեկուկես տասնյակ միլիոնի (խոսվում է թե՛ 15 և թե՛ 14 միլիոնի մասին) փոխարեն գործող իշխանությանը նվիրի 140-150 միլիոն եվրո: Ու նիկոլենք բարեգործության անվան ներքո բռերով փող բաժանեն ընտրողներին: Հիշեցնեմ, որ իշխանության հետ փոխկապակցված անձանց, ասենք, Հակոբյան Աննայի, բարեգործությունն իրավապահ համակարգի կողմից որպես այդպիսին չի դիտվում: Թե որպես ինչ է դիտվում՝ չեմ կարող ասել: Այդ հարցի պատասխանը լրագրողները նախորդ օրը կփորձեին ստանալ գլխավոր դատախազից: Եթե վերջինս բնակվեր ու գործունեություն ծավալեր ոչ թե նիկոլական բնույթի, այլ իրական ժողովրդավարական պետությունում: Ու ոչ թե լրագրող տեսնելուց փախչեր, այլ կանգներ ու հանգամանալից պատասխաներ լրագրողների հարցերին: Ճիշտ այնպես, ինչպես ընդունված է իրական ժողովրդավարական երկրներում:

Շարունակենք: Ընդդիմության հաղթանակը կասկածի ենթակա չի լինելու՝ եթե նույնիսկ Նիկոլին պաշտպանի նրան անընդհատ ձեռ առնող արևելյան բռնապետը: Ու այդ նպատակով նրա բանակը փորձի կրակոցներ արձակել կամ նույնիսկ առաջ գալ հայ-ադրբեջանական սահմանի որևէ հատվածում: Նիկոլից ազատվելուց հետո, ի վերջո, այդ բանակը դուրս է շպրտվելու հայաստանյան տարածքից: Իսկ այնուհետև դրվելու է արցախցիների վերադարձի հարցը: Ընդդիմության հաղթանակը կասկածի ենթակա չի լինելու, քանի որ նրանք, ովքեր 2021-ին վախենում էին նորից խաբվելուց կամ անտարբեր էին իրենց հայրենիքի ճակատագրի նկատմամբ, այս անգամ հասկանում են, որ Նիկոլի վերարտադրությունը հավասարազար է Հայաստանի պետականության կործանմանը: Ու դա անմիջապես վերաբերելու է հենց իրենց ու իրենց ընտանիքների անդամներին: Ընդդիմության հաղթանակը կասկածի ենթակա չի լինելու՝ եթե նույնիսկ Նիկոլը գնա լայնածավալ ընտրախախտումների: Որովհետև այդ դեպքում մարդիկ դուրս կգան փողոց՝ պաշտպանելու իրենց քվեները: Ինչպես մի ժամանակ մարդկանց հորդորում էր ընդդիմադիր Նիկոլը: Ու եթե այդ անգամ էլ վարչապետ Նիկոլը դիմի բռնությունների, ապա դա կլինի իր իշխանության վերջը:

ՀԳ. Հոդվածում մեջբերված տվյալներն առնված են «GALLUP International Association»-ի Հայաստանում լիիրավ անդամ Էմ Փի ՋԻ ՍՊԸ-ի կողմից անցկացված վերջին հեռախոսային հարցումից: