Ինձ համար գլխավորը Հայաստանի և հայ ժողովրդի շահերն են

Thu, 07 May 2026 13:51:06 +0400

«Ուժեղ Հայաստան» կուսակցության վարչապետի թեկնածու Սամվել Կարապետյանը մամուլի ասուլիսի ընթացքում հայտարարել է, որ արտաքին քաղաքականության հիմնական նպատակը լինելու է Հայաստանի համար օգտակար համագործակցությունների ձևավորումը:

Նրա խոսքով՝ երկրի համար կարևոր է հարաբերություններ կառուցել բոլոր այն պետությունների հետ, որոնց հետ համագործակցությունը կարող է բերել իրական օգուտ։ Կարապետյանը նշել է, որ այդ մոտեցման մեջ առաջնայինը ոչ թե աշխարհագրությունն է կամ քաղաքական դասակարգումները, այլ գործնական արդյունքը։

Անդրադառնալով օրինակների՝ նա ընդգծել է, որ եթե նույնիսկ փոքր կամ ոչ ավանդական ուղղություններով հնարավոր լինի շահավետ համագործակցություն, Հայաստանը պետք է օգտագործի այդ հնարավորությունները։

Խոսելով եվրոպական երկրների մասին՝ նա նշել է, որ այնտեղ հայկական համայնքների առկայությունը լրացուցիչ հիմք է ստեղծում հարաբերությունների խորացման համար, և Հայաստանը պետք է ակտիվ աշխատի այդ կապերի ամրապնդման ուղղությամբ։

Կարապետյանը նաև անդրադարձել է իր արտաքին քաղաքական դիրքորոշման վերաբերյալ քննադատություններին՝ նշելով, որ չի դիտարկում Ռուսաստանը որպես թշնամի և այն համարում է բարեկամ պետություն։ Սակայն, նրա խոսքով, ցանկացած միջազգային հարաբերության դեպքում առաջնայինը պետք է մնա Հայաստանի և հայ ժողովրդի շահը։

«Ինչ վերաբերում է իմ ռուսամետությանը, ես Ռուսաստանին չեմ համարում մեզ թշնամի, համարում եմ բարեկամ երկիր, բայց ինձ համար գլխավորը Հայաստանի և հայ ժողովրդի շահերն են»,- ասել է նա: