Թշնամիների հետ մեր հաշիվները չենք մաքրել․ Իրանի կոշտ արձագանքը՝ Նեթանյահուին

Mon, 11 May 2026 15:30:13 +0400

Թեհրանը դեռ «չի մաքրել հաշիվները» նրանց հետ, ովքեր գործել են երկրի դեմ, երկուշաբթի օրը հայտարարել է Իրանի արտաքին գործերի նախարարության խոսնակ Էսմայիլ Բաղային՝ պատասխանելով Իսրայելի վարչապետ Բենիամին Նեթանյահուի այն մեկնաբանությանը, որ Իսլամական Հանրապետության հետ պատերազմը չի ավարտվել։

Բաղայիի խոսքով՝ Իրանի զինված ուժերը «կօգտագործեն իրենց տրված ցանկացած հնարավորություն»։

«Մենք դեռ չենք մաքրել հաշիվները նրանց հետ, ովքեր գործել են Իրանի ժողովրդի դեմ։ Եթե մեր զինված ուժերին հնարավորություն տրվի, նրանք անպայման լավագույնս կօգտագործեն այն», – ասել է նա։

Հիշեցնենք, որ Նեթանյահուն CBS News-ին տված հարցազրույցում ասել է, որ Իրանի հետ պատերազմը չի ավարտվել, քանի որ հարստացված ուրանի և Իրանի հրթիռային հնարավորությունների հարցը մնում է չլուծված։ Նա նաև հայտարարել է, որ կողմ է ԱՄՆ ռազմական օգնության աստիճանական դուրսբերմանը։