Բյուրեղավանում կրկին մասսայական թունավորում է. կրկին ջրի պատճառով

Fri, 17 Jul 2026 19:15:16 +0400

Բյուրեղավան համայնքում աղիքային վարակի դեպքեր են արձանագրվել: Հանրապետական շտապօգնության ծառայությունը գիշերվա ընթացքում ստացել է 15 կանչ, որից 6-ն ավարտվել է հոսպիտալացումով: Հիմնական ախտանիշները` ինքնազգացողության վատացում, ջերմության բարձրացում, որովայնի շրջանում ցավ:

Հոսպիտալացվածների առողջական վիճակը բժիշկները գնահատում են միջին ծանրության: Նրանք ստանում են անհրաժեշտ բուժօգնություն: Այս պահին կատարվում են դեպքերի համաճարակաբանական հետազոտություն, նմուշառում և լաբորատոր հետազոտություններ՝ հիվանդության հավանական աղբյուրը և փոխանցման գործոնները պարզելու նպատակով։

«Հրապարակ»-ի հետ զրույցում «Անդրանիկ Պետրոսյանի անվան Բյուրեղավանի քաղաքային պոլիկլինիկա» ՓԲԸ-ի տնօրեն Արմեն Վարդումյանը հայտնեց, որ կանչերը սկսվել են գիշերվանից. «Երեկ երեկոյան շտապ օգնությունը կանչեր է ստացել։ Հենց գիշերն էլ տեղեկացրել ենք ՀՎԿԱԿ, երբ իրար նման գանգատներով տեսել ենք, որ կանչեր կան մասսայական։ Այս պահին էլ կանչեր կան, օրվա ընթացքում 30-ից ավել մարդ էլ դիմել է պոլիկլինիկա, ու դիմողները հիմնականում նշում են, որ իրենց հարևանը կամ ընտանիքի անդամը նույն գանգատներն ունեն, բայց ավելի թույլ արտահայտված։ Այսինքն, մասշտաբները շատ ավելի մեծ են։ Դիմողների մեջ շատ են երեխաները»։
Հարցին` կասկածներ կա՞ն, թե որն է պատճառը` Վարդումյանը նշեց. «Ես մտածում եմ, որ պատճառը կարող է ջուրը լինել։ Կանչեր եղել են Արզնի, Բյուրեղավան և Նուռնուս բնակավայրերից, այլ պատճառ չէր կարող լինել իմ կարծիքով»։ Նրա խոսքով ջրի որակի հետ կապված խնդիրներ վերջին օրերին նկատելի են. «Նախորդ անգամ էլ մարդիկ սկսեցին ջեւր չխմել, եռացնել` նոր խմել, դեպքերը գնացին դեպի մարում։ Այս անգամ էլ մարդիկ նշում են, որ ջրից տհաճ հոտ է եկել վերջին օրերին, պղտոր է եղել»։

Հիշեցնենք, որ ապրիլին Բյուրեղավանում կրկին մասսայական թունավորման դեպք էր գրանցվել։ Հարյուրավոր մարդիկ բուժօգնության էին դիմել։ Այն ժամանակ նախ հայտարարվեց, որ ջրի փորձանմուշում բակտերիաներ են հայտնաբերվել, ապա Վեոլիա ջուրը հերքեց, նշելով, որ կրկնակի փորձաքննության արդյունքում հաստատվել է, որ ջրի բաղադրությունը համապատասխանում է սահմանված նորմերին։ Ի վերջո այդպես էլ պարզ չդարձավ թունավորման պատճառը, մեղավորների շրջանակը և որևէ մեկը պատասխանատվություն չկրեց։