«Տիտանիկ»-ի հետքերով․ պատմական ևս մեկ նավ է «խորտակվել»

Thu, 12 Nov 2026 22:30:56 +0400

Պատմական SS United States օվկիանոսային լայները, որը ավելի քան 30 մետրով ավելի երկար էր, քան «Տիտանիկը», խորտակվել է Մեքսիկական ծոցի հատակում՝ Ֆլորիդայի ափերի մոտ։

Նավը միտումնավոր են ուղղորդել դեպի օվկիանոսի հատակը՝ դարձնելով աշխարհի ամենամեծ արհեստական ​​​​խութը։

Նավը ծով է քաշվել նոյեմբերի 11-ին, տեղական ժամանակով ժամը 14:40-ին, և խորտակումը սկսվել է երկու ժամ անց։ Կորպուսում անցքեր են արվել, որոնք թույլ են տվել ջրի ներթափանցումը, որից հետո նավը ուղղահայաց խորտակվել է։

Associated Press-ի տվյալներով՝ կազմակերպիչները ենթադրում էին, որ լայները կխորտակվի մոտ մեկ ժամից։ Սակայն «հրաժեշտը» ձգձգվել է։ SS United States-ը վերջապես խորտակվել է տեղական ժամանակով մոտավորապես ժամը 21:00-ին։ Նավն այժմ գտնվում է մոտ 55 մետր խորության վրա, իսկ վերին տախտակամածները՝ մոտ 18 մետր մակերևույթից ցածր։ Նոր խութը կլինի շրջանի մոտ 500 արհեստական ​​​​խութերից մեկը։

SS United States-ը համարվում է 20-րդ դարի կեսերի ինժեներական ուշագրավ նվաճում։ Նախագծված լինելով 1946 թվականին, այն արագության ռեկորդ սահմանեց Ատլանտյան օվկիանոսը հատելու համար 1952 թվականին իր առաջին ճանապարհորդության ժամանակ։

SS United States-ը մոտավորապես 305 մետր երկարություն ունի, մինչդեռ լեգենդար Տիտանիկը՝ 269 մետր էր։

SS United States-ը դուրս է բերվել շահագործումից 1969 թվականին։ Դրանից հետո 30 տարի այն մնացել է խարսխված նավամատույցում։ Ժառանգության պահպանման խմբերը բազմիցս փորձել են վերականգնել նավը, բայց 2026 թվականին իշխանությունները որոշել են նավը վերածել արհեստական ​​խութի։