Շաբաթ , 21 Նոյեմբերի 2026

Նիկոլի մոգական թղթի իրական ուժը

Նիկոլի մոգական թղթի իրական ուժը

Thu, 19 Nov 2026 19:15:44 +0400


Վերջապես բացահայտվեց, թե որն էր վարչապետի պաշտոնը զբաղեցնող անձի այն առաջարկը, որը չէր կարող չընդունվել ընդդիմության կողմից: Մարդը որոշել է խաղաղություն հաստատել Հայաստանի ու Ադրբեջանի միջև և հեռանալ պաշտոնից: Հեռանալ նույնիսկ այն դեպքում, երբ դա իրեն չհաջողվի: Այսինքն, հանրաքվեով «ոչ» ասվի նոր այն սահմանադրությանը, ինչը խաղաղություն հաստատման ադրբեջանական պահանջն է կամ նախապայմանը (ասեմ, որ դրանք բացարձակ նույնն են): Երևի մոռացել է, որ ինքն, իր ասելով, 3 անգամ հրաժարական է տվել ու, անուամենայնիվ, վերընտրվել: Բայց վերընտրվել է, որովհետև հրաժարական տալով՝ պահպանել է վարչապետի պաշտոնը, օգտվել այդ կարգավիճակի ընձեռած վարչական լծակներից: Իսկ դա նշանակում է ընտրակեղծարարության ապահովում, ընդդիմադիր ակտիվիստների կալանավորումներ և այլն: Այսինքն, հաղթանակ ձեռք բերելու գործիքներ: Այդքանն իմանալով՝ ինչո՞ւ պետք է ընդդիմությունը հավատա, որ կանի իր այս ասածը: Ո՞ր խոստումն է կատարել, որ այդ մեկը ևս կատարի…

Չեմ հավատում նաև, թե ինքն ընդամենը խաղաղության մունետիկ է: Եվ իր գործն ավարտված կհամարի՝ եթե կնքվի խաղաղության պայմանագիրը: Ու, իր ասելով, նաև դրանից հետո ինչ-ինչ խնդիրներ լուծվեն: Կարծում եմ, որ դրանց լուծումն օբյեկտիվ և հատկապես սուբյեկտիվ առումներով կպահանջի տասնամյակներ: Ու ինքը մինչև խոր ծերություն կփորձի մնալ վարչապետի պաշտոնում: Եթե, իհարկե, դա իրեն թույլ տան հայաստանյան ընտրողները: Ինչևէ, վերադառնալով Իլհամի հետ մշտական (իրականում՝ կապիտուլյանտական, ինչը չի կարող մշտական լինել) խաղաղության պայմանագիր կնքելու նրա ցանկությանը, արձանագրենք, որ պատմությունը նրան դասեր չի սովորեցնում: Չնայած ինքն անընդհատ հայոց պատմության վերաբերյալ ակադեմիական հատորներ է կարդում: Եթե սովորեցներ, ապա կիմանար, որ Հայկական հարցը ոչ թե 19-րդ դարի 70-ականների ծնունդ է՝ ենթադրաբար նկատի ունենալով 1877-1878 թթ.-ի ռուս-թուրքական պատերազմը: Այլ որ այն, նախ, ընդամենը միջազգայնացվեց ռուսական հաղթանակի շնորհիվ: Սակայն թաղվեց եվրոպական դիվանագետների փորած բեռլինյան փոսում:

Երկրորդ, թուրքահպատակ հայության գրագետ ու կրթված հատվածը դրանից երեք տասնամյակ անց որոշեց հավատալ երիտթուրքերի կարգախոսներին ու աջակցեց նրանց հեղափոխությանը: Սակայն դրա հաղթանակից մեկ տարի անց՝ 2009-ին, կազմակերպվեցին Ադանայի ջարդերը: Էլ չասած 2015-ի Մեծ եղեռնի մասին: Ի դեպ, երիտթուրքերն, ի տարբերություն Իլհամ Ալիևի, եվրոպաններում կրթված անձինք էին, իսկ դրանց պարագլուխներից ոմանք էլ մասոնական օթյակների «լուսավորյալ» անդամներ: Բայց այդ գործոնները չխոչընդոտեցին ո՛չ Ադանայի ջարդերը և ո՛չ էլ Ցեղասպանությունը: Թե ինչու պետք է այլ կերպ վարվի Իլհամը պարզ չէ. հատկապես որ չի թաքցնում հայատյացությունն ու հայերին իրենց պատմական ու իրական Հայրենիքի վերջին հատվածից վտարելու ցանկությունը:
Երևի մեր ժողովրդի ճակատագրի առումով ասվածից հետո գրագետ անձի համար կարիք չլիներ, բայց վարչապետի պաշտոնը զբաղեցնող անձին հիշեցնեմ 100 տարի առաջվա հանրահայտ մեկ այլ օրինակ: Այն ժամանակ իր նման մեկը ևս կար, բայց հեռավոր Անգլիայում: Մեծ Բրիտանիայի վարչապետ Նևիլ Չեմբեռլենը 1938-ի սեպտեմբերի 30-ին լոնդոնյան օդանավակաւյաններից մեկում լրագրողների քթի առջև թղթի կտոր էր թափահարում՝ հայտարարելով, թե մշտական խաղաղություն է հաստատել Եվրոպայում: Հանուն այդ թղթի կտորի ինքը հրաժարվել էր պաշտպանել Չեխոսլովակիայի անվտանգությունն ու տարածքային ամբողջականությունը՝ Հիտլերին թույլ տալով օկուպացնել այդ երկրի՝ գերմանացիներով բնակեցված Սուդետական մարզը: Այն օրերին վարչապետ Չեմբեռլենը հայտնի էր գերմանական ագրեսորին ամեն գնով «խաղաղեցնելու» իր քաղաքականությամբ, ինչի արդյունքում ստորագրվեց Մյունխենի համաձայնագիրը: Թե ինչ տեղի ունեցավ դրանից համարյա մեկ տարի անց, ենթադրաբար, հայտնի է նաև ՀՀ վարչապետի պաշտոնը զբաղեցնող անձին:

© 2026 Հրապարակ

Source: Hraparak

Մասին Hraparak.am

Hraparak.am

Կարդացեք նաև

«Հրապարակ»․ Նոր սահմանադրության մեջ գրվա՞ծ է, որ անձը չի կարող 10 տարուց ավելի պաշտոնավարել

«Հրապարակ»․ Նոր սահմանադրության մեջ գրվա՞ծ է, որ անձը չի կարող 10 տարուց ավելի պաշտոնավարել Sat, …

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով