Շոկոլադը կարող է անհետանալ՝ որպես մթերք

Thu, 09 Apr 2026 23:00:43 +0400

Շոկոլադը, որ շատ մարդկանց համար սիրելի անուշեղեններից է համարվում, կարող է հայտնվել անհետացման վտանգի տակ։ Ընդ որում, դա կարող է լինել արդեն 2050 թվականին։ Պատճառը՝ կլիմայական գլոբալ փոփոխություններն են։ Համաձայն իրականացված ուսումնասիրությունների, կլիմայական փոփոխությունները կհարվածեն կակաոյի համաշխարհային արտադրության մեծ մասին։

Արեւմտյան Աֆրիկան, որը ապահովում է կակաոյի համաշխարհային արտադրանքի 70 տոկոսը, կարող է անկայուն կլիմայական պայմանների պատճառով կորցնել իր հողերի մի մասը, որոնք պիտանի են կակաոյի աճեցման համար։ Կոլումբիան, որը նույնպես կակաոյի խոշոր մատակարար է, կարող է կորցնել իր մշակության համար պիտանի հողերի քսան տոկոսը։ Դա կլինի չափազանց շոգ եղանակի, անկայուն տեղումների, երաշտների, անտառային հրդեհների եւ բույսերի հիվանդությունների պատճառով։