«Հրապարակ». Իրենք էլ գիտեն, որ ձայն չունեն

Sat, 25 Apr 2026 11:15:42 +0400

Նախօրեին հրապարակվեցին հունիսի 7-ին մասնակցող քաղաքական ուժերի հայտերը, եւ պարզ դարձավ, որ 19 ուժ է հայտ ներկայացրել: Այս անգամ խորհրդարանական ընտրություններին արեւմտամետ դիրքորոշում ունեցող, պրոիշխանական ուժերը որոշել են մասնակցել առանձին-առանձին, այլ ոչ թե մեկ դաշինքով: Արման Բաբաջանյանը, Հովսեփ Խուշուդյանի եւ Ազատ Արշակյանի հետ առանձին կազմով է մասնակցելու ընտրություններին, Արամ Զավենի Սարգսյանը` առանձին, Լեւոն Շիրինյանը, որը նախորդ ընտրություններին Ա. Բաբաջանյանի հետ էր մասնակցում, այս անգամ եւս որոշել է առանձին մասնակցել ընտրություններին, դե իսկ Գուրգեն Սիմոնյանն այս ընտրություններին մասնակցելու է իշխանամետ քաղաքագետ Էդվարդ Անտինյանի հետ: Եվրոպական կուսակցության առաջնորդ Տիգրան Խզմալյանն էլ օրեր առաջ հայտարարեց, որ «Բոլորին դեմ եմ» կուսակցության հետ բանակցություններ են վարել, սակայն դրանք հաջողության չեն հասել, եւ ինքը որոշել է ընտրություններին չմասնակցել:

Հիշեցնենք, որ այն բանից հետո, երբ 2023-ի աշնանը Արամ Սարգսյանի «Հանրապետություն» կուսակցությունը միացավ ՔՊ-ին, դրան հաջորդած երկու ՏԻՄ ընտրություններում` Գյումրիում եւ Վաղարշապատում, Եվրադաշինքը շատ քիչ ձայներ ստացավ եւ չհաղթահարեց անցողիկ շեմը: Ինչո՞ւ են այս ուժերն այժմ որոշել ընտրությունների գնալ առանձին-առանձին, ի՞նչ շանսեր ունեն այս պարագայում: «Հրապարակը» զրուցել է քաղաքագետ Արմեն Բաղդասարյանի հետ:

– Ըստ Ձեզ` ինչո՞ւ են վերոնշյալ ուժերը որոշել առանձին-առանձին գնալ ընտրությունների: Ի՞նչ շանսեր ունեն, առհասարակ` նրանց ընտրողների թիվը մե՞ծ է:

– Ոչ, նրանցից ոչ մեկը չունի շանսեր: Իրենք էլ գիտեն, որ ձայն չունեն, չգիտեմ, թե ինչու չեն միացել իրար, բայց նրանցից ոչ մեկը, բնականաբար, չի պայքարում հաջորդ խորհրդարանում հայտնվելու համար: Նրանք գիտեն, թե ինչ ռեսուրսներ եւ վարկանիշ ունեն: Լավագույն դեպքում, այս ուժերը միասին կարող են պայքարել երկու տոկոսը հաղթահարելու համար, որպեսզի, ըստ օրենքի, պետական ֆինանսավորում ստանան: Անգամ 2 տոկոս հաղթահարելու շանս, կարծում եմ, չունեն, գուցե «Հանրապետություն» կուսակցությունը կարողանա 2 տոկոսի շեմը հաղթահարել, մյուսները դա էլ չեն կարող:

– Ասում են` Արամ Սարգսյանը չի ցանկացել որեւէ ուժի միանալ, պնդել է, որ առանձին ավելի շատ ձայներ ունի, քան երբ միանում է մյուսների հետ, միացողներն իրենից ընտրող են վանում:

– Անցողիկ շեմն Արամ Սարգսյանը չի կարող հաղթահարել, նա հույս ունի, որ գոնե երկու տոկոս ձայն կստանա, դա է իրենց հիմնական նպատակը, որպեսզի գումար ստանան պետությունից: Այն ուժերը, ովքեր հաղթահարում են երկու տոկոս շեմը, բայց չեն մտնում խորհրդարան, պետությունից գումարներ են ստանում` գրասենյակներ պահելու եւ այլ նպատակներով: Այս մարդկանց նպատակը դա է:

– Իսկ գուցե նրանց նպատակը ձայների փոշիացո՞ւմն է:

– Չէ, ձայների փոշիացման խնդիր չկա: Ձայներ փոշիացնելու են ընդդիմադիր ուժերը: Ցավոք, նրանք հաղթելու մի տարբերակ ունեին` միավորում, իսկ այդ շանսը նրանք արդեն բաց են թողել: Ընտրությունների ելքը, մեծ հաշվով, կանխատեսելի է: Իշխանական ուժերն այլեւս ձայն փոշիացնելու խնդիր չունեն: